नेपाली कांग्रेसका वरिष्ठ नेता रामचन्द्र पौडेलले प्रतिनिधि सभा चुनावसम्मै यो गठबन्धन कायम रहने बताएका छन् । 

कांग्रेसको प्रतिस्पर्धा माओवादी केन्द्रसँग नभई एमालेको केपी ओली प्रवृत्तिसँग भएको उनले बताए । 

चितवनको भरतपुरमा आयोजित चुनावी सभालाई बिहीवार सम्बोधन गर्दै नेता पौडेलले गत निर्वाचनमा २३ सिटमा खुम्चिएको कांग्रेसलाई ९३ सिटमा पुर्‍याउन गठबन्धन जरुरी रहेको बताएका हुन् । 

‘अहिले नेपाली कांग्रेसको प्रतिस्पर्धा, माओवादी र प्रचण्डसँग होइन, ओली प्रवृत्तिसँग हो,’ पौडेलले भने, ‘केही साथीहरूले मलाई देउवाको लाइनमा गइस् भने, त्यसो होइन, मैले त ओलीको निरंकुशता सर्वसत्तावादतर्फ अगाडि बढ्दै गएको बेला नै गठबन्धनको कुरा गरेको थिएँ ।’ 

पौडेलले भोलिको दिनमा पनि मिलेर सरकार बनाउनुपर्ने भएकाले गठबन्धन कायम रहने बताए ।

‘म फेरि भन्छु, माओवादी प्रतिस्पर्धी होइन, माओवादीसँग सहकार्य गर्नु अहिलेको आवश्यकता हो । भोलि मिलेर सरकार बनाउनुछ भने अहिले किन तालमेल नगर्ने ?’ पौडेलले भने ।