सौन्दर्य प्रतियोगिताको आडमा युवती बलात्कार भएको घटनाले झण्डै ८ वर्षपछि सिंगो देशलाई तरंगित बनाएको छ ।

पीडित युवतीले टिकटकमार्फत शृंखलाबद्ध भिडियो सार्वजनिक गर्दै आफूमाथि भएको अत्याचारको पर्दाफास गरेकी थिइन् । तर पीडित युवती मानसिकरूपमा विक्षिप्त रहेकाले प्रहरीले जाहेरी लिन समेत पाएको छैन ।

ती युवतीलाई प्रहरीले काँडाघारीस्थित उनकै घरमा काउन्सिलिङ दिएर राखेको छ ।

अपराध अनुसन्धानमा खटिएका प्रहरी अधिकारीका अनुसार उनले अहिलेसम्म प्रहरीलाई विश्वास गर्न सकेकी छैनन् । मानसिक रूपमा विक्षिप्त रहेकाले कसलाई विश्वास गर्ने, कसलाई नगर्ने भन्ने सोच्न नसक्ने अवस्थामा उनी रहेको प्रहरीले जनाएको छ ।

‘हामीले काउन्सिलिङ गरिरहेका छौं । उहाँ अझै पनि कसलाई विश्वास गर्ने, कसलाई नगर्ने भन्नेमा अन्योलमा रहनुभएको देखिन्छ,’ काठमाडौं अपराध अनुसन्धान कार्यालयका प्रमुख तथा अनुसन्धान समितिका संयोजक वरिष्ठ प्रहरी उपरीक्षक (एसएसपी) वसन्त कुँवरले भने । 

युवतीले पीडक भनेर आरोपित गरेका मनोज पाण्डेलाई हिजो प्रहरीले शनिवार साँझ काठमाडौंको स्वयम्भुबाट नियन्त्रणमा लिएको थियो ।

अभद्र व्यवहारसम्बन्धी कसूरमा अनुसन्धान गर्ने गरी अदालतबाट म्याद लिएर हिरासतमा राख्ने प्रहरीको तयारी छ ।

पाण्डेलाई पक्राउ गरेपछि आज सोमवार पहिलोपटक अदालत खुलेकाले आज म्याद लिन लागिएको हो ।

करीब आठ वर्ष अगाडि भएको घटनाको उजुरी दिने हदम्याद नाघेका कारण अनुसन्धान प्रक्रिया अगाडि बढाउन कानूनी जटिलता उत्पन्न भएको छ ।

सडकदेखि सदनसम्म चर्को आवाज उठेपछि संसदबाट सभामुख अग्निप्रसाद सापकोटाले रुलिङ गर्दै सरकारलाई आवश्यक कानूनी कारवाही अगाडि बढाउन भनेका थिए ।

त्यसलगत्तै गृहमन्त्रालयले प्रहरी प्रधान कार्यालयलाई निर्देशन दिएको थियो । 

प्रहरीले काठमाडौं उपत्यका अपराध अनुसन्धान कार्यालयका प्रमुख एसएसपी वसन्त कुँवरको संयोजकत्वमा प्रहरी उपरीक्षक र प्रहरी नायब उपरीक्षकसहित ५ सदस्यीय समिति गठन गरेर अनुसन्धान अगाडि बढाएको छ । 

समितिले अहिले यो घटनालाई कसरी स्थापित गर्ने भन्ने विषयमा कानून व्यवसायीहरूसँग परामर्श गरिरहेको छ । 

‘घटना पुरानो भएकाले त्यसलाई कसरी अनुसन्धान गर्न सकिन्छ भनेर कानूनी परामर्शमा छौं,’ एसएसपी कुवँरले लोकान्तरसँग भने, ‘केही निकास निस्किएला ।’

प्रहरीले अनुसन्धानलाई अगाडि बढाउन दुईवटा विकल्पमा विचार गरिरहेको छ । पहिलो, आरोपित मनोज पाण्डेलाई मानव बेचबिखन तथा शरीर बन्धकसम्बन्धी कसूरमा अनुसन्धान गरेर कारवाही प्रक्रिया अगाडि बढाउने ।

दोस्रो, जाहेरी दर्ता नभएको विषयलाई लिएर पीडित पक्ष अदालत जाने, अनि अदालतको आदेश आएमा त्यसकै आधारमा अनुसन्धान अगाडि बढाउने ।

अदालतले यसअघि अर्कै प्रकृतिको, तर हदम्याद नाघेको मुद्दामा अनुसन्धान अगाडि बढाउन आदेश दिएको नजिर छ ।

घटनाको प्रकृति अलग भएकाले त्यही नजिरमा टेकेर मात्र अगाडि बढ्न सकिने अवस्था नरहेको अधिवक्ता मुरारी सापकोटा बताउँछन् ।

‘नजिर लागू हुनलाई घटना र परिस्थिति एउटै हुनु जरुरी छ,’ सापकोटाले भने, ‘कि त कानून नै परिवर्तन हुनुपर्‍यो, होइन भने यो विषय अब कानूनले चिन्दैन ।’ 

यस्तो अवस्थामा जिल्ला प्रशासन कार्यालयबाट अनुमति लिएर अनुसन्धान गर्ने बाटो बाँकी रहेको उनको सुझाव छ ।