नेपाली कांग्रेसका प्रवक्ता डा. प्रकाशशरण महतले नेकपा एमालेका अध्यक्ष केपी शर्मा ओलीले गरेको गलत कामको असर कांग्रेसलाई पनि परेको दाबी गरेका छन् । 

काठमाडौंलगायत शहरमा स्वतन्त्र उम्मेदवार आउनु ओलीको गलत कामको असर भएको उनको आरोप थियो । 

पार्टी केन्द्रीय कार्यालय सानेपामा सोमवार आयोजित पत्रकार सम्मेलनमा महतले काठमाडौंमा स्वतन्त्र उम्मेदवारले मत पाउनु अपवाद भएको बताएका हुन् । ‘केपी ओलीजीको घानमा नेपाली कांग्रेस परेको हो, पाँच वर्षको म्यान्डेट सही ढंगले पूरा नगर्नु मूलभूत असन्तुष्टि हो । त्यसको रियाक्सन पनि हो, त्यसको असर व्यवहार अरू दलले पनि व्यहोर्नुपर्ने हुन्छ,’ महतले भने । 

महतले काठमाडौंमा स्वतन्त्र उम्मेदवारले पाएको मत अपवाद भन्दै दलहरू असफल भए भन्नु गलत हुने जिकिर गरे । ‘निर्वाचनमा अपवाद जहिले पनि हुन्छ । काठमाडौं लगायतको अपवादलाई लिएर दल असफल भइसक्यो भन्ने निष्कर्षमा पुग्नु गलत हो,’ महतले भने, ‘मतदाता के कारणले दलसँग असन्तुष्ट छन् भन्ने कुरा आउँदो दिनमा सम्बोधन गर्ने कोसिस गर्छौं ।’