तारा एयरको जहाज दुर्घटनामा चालक दलका सदस्य र यात्रुहरूको मृत्यु भएको घटनाप्रति नेपाली कांग्रेसले दुःख व्यक्त गरेको छ । 

सोमवार एक वक्तव्य जारी गर्दै कांग्रेसले दुर्घटनामा ज्यान गुमाउने विमान चालक, सहचालक, परिचारिका र यात्रुहरूप्रति श्रद्धाञ्जली व्यक्त गरेको हो । 

साथै शोक सन्तप्त परिवारजनप्रति समवेदना पनि प्रकट गरिएको छ । 

पार्टी प्रवक्ता प्रकाशशरण महतले जारी गरेको वक्तव्यमा भनिएको छ, ‘नेपालको हवाई सेवालाई सुरक्षित बनाउन सम्भाव्य सबै उपाय अवलम्बन गर्न पनि नेपाली कांग्रेस नेपाल सरकारसँग माग गर्दछ ।’

आइतवार पोखराबाट जोमसोमका लागि उडेको तारा एयरको जहाज मुस्ताङको थासाङ गाउँपालिका–२ को सानोस्वारे भीरमा दुर्घटनाग्रस्त भएको हो ।