‘किसानलाई पेन्सन चाहिँदैन, खेतमा पानी, समयमा मल र उम्रिने बीउ भए पुग्छ’

जनता प्रगतिशील पार्टीका अध्यक्ष एवं प्रतिनिधि सभा सदस्य हृदयेश त्रिपाठीले किसानका लागि पेन्सन आवश्यक नभएको बताएका छन् । किसानलाइ पेन्सन दिने कुरा हावादारी भएको उनले टिप्पणी गरे । 

‘किसानलाई पेन्सन चाहिँदैन, खेतमा पानी, समयमा मल र उम्रिने बीउ भए पुग्छ । विडम्बना असारको रोपाइँका लागि पनि मल अभाव छ र पाउने सम्भावना छैन,’ बुधवार प्रतिनिधि सभामा बजेटमाथिको सैद्धान्तिक छलफलमा भाग लिँदै त्रिपाठीले भने, ‘पेन्सन दिने भनेको के हावादारी कुरा हो ? यदि कृषि उपजको बीमाको कुरा गरेको भए उपयुक्त हुन्थ्यो । पेन्सन दिने के आधारमा ? के मोडालिटी हुन्छ ?’

कृषिमा छुट्टाइएको बजेट २ प्रतिशत फजुल खर्च र १ प्रतिशत मात्र किसानले पाउने गरेको उनले दाबी गरे । पूर्व सामान्य प्रशासन मन्त्री समेत रहेका त्रिपाठीले माथिदेखि तलसम्मका कर्मचारीको तलब एउटै प्रतिशतमा बढाउँदा पेन्सनमा भार पर्ने टिप्पणी गरे ।