जनकपुरबाट भैरहवातर्फ आइरहेको यात्रुबहाक बस आइतवार बिहान दुर्घटना हुँदा ९ जनाको मृत्यु भएको छ ।

लु२ख ३८४१ नम्बरको बस हुलाकी राजमार्ग अन्तर्गत भैरहवा परासी सडक खण्ड अन्तर्गत रोहणी खोलामा खसेको थियो । 

जिल्ला प्रहरी कार्यालय, रुपन्देहीका प्रवक्ता नवरत्न पौडेलले दुर्घटनामा १ जना महिला सहित ९ जना यात्रुको मृत्यु भएको लोकान्तरलाई जानकारी दिए । गाडी पुलको रेलिङ भाँचेर खोलामा खसेको छ । 

दुर्घटनास्थलबाट ३३ जना यात्रुको उद्दार गरिएको थियो । घाइते यात्रुहरुको भैरहवास्थित भीम अस्पताल र युनिर्भसल कलेज अफ मेडिकल साइन्सेज (युसिएमएस) मा उपचार भइरहेको छ । 

जेसीभीको माध्यमबाट दुर्घटनामा परेको बसलाई पल्टाएर यात्रुको उद्दार गरिएको थियो । मृत्यु भएकाका यात्रुहरुको पहिचान अहिलेसम्म खुल्न सकेको छैन । डिएसपी पौडेलले भने, ‘१५ जना गम्भीर घाइते छन् । उनीहरुको उपचार भइरहेको छ ।’

बस बिहान पौने ६ बजे दुर्घटनामा परेको थियो । गाडी दुर्घटनाको कारण अहिलेसम्म खुल्न सकेको छैन । रात्रीकालिन बस भएको हुँदा चालक निदाउँदा दुर्घटना भएको हुनसक्ने प्रहरीको अनुमान छ । दुर्घटनामा गाडी चालक पनि घाइते छन् ।