सरकारले नेपाल वायु सेवा निगमका महाप्रबन्धक डिमप्रसाद पौडेललाई बर्खास्त गरेको छ ।

कार्यकारी अध्यक्षमा युवराज अधिकारी नियुक्त भएपछि भूमिकाविहीन बनाएर राखेको पौडेललाई  साढे ७ महिनापछि सोमवारको मन्त्रिपरिषद् बैठकले बर्खास्त गरेको हो ।

पौडेल कार्यकारी भूमिकामा नभए पनि पर्यटन मन्त्रालयमा हाजिर हुने र निगमको सञ्चालक समिति बैठकमा जान पाउने अधिकार थियो ।

पछिल्लो समय कर्मचारी आन्दोलनपछि पौडेललाई बोर्ड बैठकमा पनि प्रवेश दिइएको थिएन । सरकारले २०७७ असोज २२ गते पौडेललाई निगमको महाप्रबन्धक पदमा नियुक्त गरेको थियो । 

सरकारले २०७८ कात्तिक ८ गते निगमको कार्यकारी अध्यक्षमा अधिकारीलाई नियुक्त गरेको थियो । पौडेललाई पूर्व मन्त्री योगेश भट्टराईले नियुक्त गरेका थिए भने अधिकारीलाई पर्यटन मन्त्री प्रेमबहादुर आलेले नियुक्त गरेका थिए ।

साढे ७ महिनादेखि भूमिकाविहीन अवस्थामा भएका पौडेललाई सरकारले राजीनामा गर्न भने पनि मानेका थिएनन् ।