नेपाली कांग्रेसले जिल्ला समन्वय समिति जुम्लाको प्रमुख पदमा चन्दननाथ नगरपालिका–१ का वडा सदस्य गौरीनन्द आचार्यलाई सिफारिस गरेको छ ।

कर्णाली प्रदेश संसदीय समितिको निर्णयअनुसार आचार्यलाई प्रमुखको उम्मेदवारमा सिफारिस गरेको कांग्रेस जुम्लाका पार्टी सचिव अर्जुनसिंह कठायतले जानकारी दिए ।

जिल्लाका ८ स्थानीय तहमध्ये कांग्रेस एक्लैले ५ स्थानीय तहमा अध्यक्ष र १ उपप्रमुखसहित २ उपाध्यक्ष जितेको छ ।

नेकपा माओवादी केन्द्रले २ पालिकामा अध्यक्ष र ३ उपाध्यक्ष जितेको छ । नेकपा एकीकृत समाजवादीले १ उपाध्यक्ष जितेको छ । चन्दननाथ नगर प्रमुखमा स्वतन्त्र उम्मेदवार विजयी भएका छन् ।

मतदाताका हिसाबले जुम्ला जिल्ला समन्वय समितिको प्रमुख र उपप्रमुख कांग्रेसकै बन्ने पक्काजस्तै छ ।

जिससको नयाँ नेतृत्व चयनका लागि जेठ २९ गते निर्वाचन हुने मुख्य निर्वाचन अधिकृत जवाहरप्रसाद सिंहले जानकारी दिए । विक्रम संवत् २०७४ सालको स्थानीय तह निर्वाचनमा जुम्लामा माओवादी केन्द्रले जिल्ला समन्वय समिति प्रमुख र कांग्रेस उपप्रमुखको नेतृत्व गरेको थियो ।