सरकारले तेजाब तथा अन्य घातक रासायनिक पदार्थको नियमनका सम्बन्धमा व्यवस्था गर्न बनेको विधेयक संसदमा पेश गर्ने तयारी गरेको छ । 

सोमवार बसेको मन्त्रिपरिषदको बैठकले विधेयक संसदमा पेश गर्न स्वीकृति दिने निर्णय गरेको गृहमन्त्री बालकृष्ण खाणले बताए । 

यसअघि अध्यादेशको रुपमा जारी भएको उक्त विधेयक निस्क्रिय भएको थियो । 

त्यसै गरी, सरकारले रेल्वे सम्बन्धमा व्यवस्था गर्न बनेको अध्यादेश प्रतिस्थापन विधेयक पनि संसदमा पेश गर्न मन्त्रिपरिषद्को बैठकले स्वीकृति दिएको छ ।

सरकारले जारी गरेको अध्यादेशको आधारमा जनकपुर–जयनगर रेल सञ्चालन भइरहेको छ ।

विश्व बैंकबाट हरित उत्थानशील र समावेशी विकासका लागि प्राप्त हुने करीब १२ अर्ब रूपैयाँको सहुलियत ऋण लिन वार्ता टोली गठन गर्ने निर्णय पनि मन्त्रिपरिषद्को बैठकले गरेको छ । 

सरकारले सशस्त्र प्रहरी नायव महानिरीक्षकमा चन्द्रप्रकाश मैनालीलाई बढुवा नियुक्ति गर्ने निर्णय पनि मन्त्रिपरिषदबाट भएको गृहमन्त्री खाणले बताए ।

त्यसैगरी, सरकारले प्रहरी नायव महानिरीक्षकहरू उत्तमराज सुवेदी, अरुणकुमार विसी, दिवेश लोहनी, मुकुन्दराज आचार्य र पूजा सिंहलाई प्रहरी अतिरिक्त महानिरीक्षक पदमा बढुवा नियुक्ति गर्ने निर्णय भएको गृहमन्त्रीले खाणले बताए । 

यीलगायतका मन्त्रिपरिषद्ले विभिन्न २२ वटा निर्णय गरेको छ ।