अमेरिकी राज्य साझेदारी कार्यक्रम (एसपीपी)मा नेपालको संलग्नता सम्बन्धमा जानकारी दिन बोलाइएका प्रधानमन्त्री शेरबहादुर देउवा संसदीय समितिमा अनुपस्थित भएका छन् ।

प्रतिनिधि सभाको अन्तर्राष्ट्रिय सम्बन्ध समितिले जानकारीका लागि देउवालाई आइतवार समितिमा बोलाएको थियो । 

प्रधानमन्त्री देउवाले अर्को दिनको समय माग गरेको सभापति पवित्रा निरौला खरेलले जानकारी गराइन् । 

उनले संसदीय समितिले समय दिएर बोलाउदा पनि नआउनु समितिको अपमान भएको बताइन् । 

देउवाको सचिवालयले आइतवार बिहान ८ बजेमात्र प्रधानमन्त्री समितिमा आउन नसक्ने जानकारी गराएको थियो । 

देउवा अनुपस्थित भएपछि एसपीपीबारे जानकारी गराउन गृहमन्त्री बालकृष्ण खाण संसदीय समितिमा जाँदैछन् । 

सरकारले एसपीपीलाई पठाएको पत्रचार सम्बन्धी सम्पूर्ण कागजात एक साताभित्र उपलव्ध गराउने जानकारी गराएको उनले बताइन् ।

देउवा नआउने भएपछि समितिको बैठकमा सहभागी हुन गएका नेकपा एसका अध्यक्ष माधवकुमार नेपाल बैठकबाट बाहिरिएका छन् ।