ललितपुर महानगरपालिकामा सवारी दुर्घटना न्यूनीकरण र ट्राफिक व्यवस्थापन सहज बनाउन धेरैजसो ठाउँमा वान–वे र साइकल लेन बनाउन थालिएको छ । 

महानगर प्रमुख (मेयर) चिरिबाबु महर्जनले सवारी दुर्घटना न्यूनीकरण र ट्राफिक व्यवस्थापनमा ललितपुर महानगरपालिकाको भूमिका नामक एक कार्यक्रमबीच साइकल लेन बनाउने घोषणा गरेका हुन् ।

कार्यक्रममा महर्जनले भने, ‘हाम्रो भूगोल सानो छ तर जनसंख्या अचाक्ली छ, त्यसमा पनि गाडी र मोटरसाइकलको संख्या अत्यधिक छ । यसले गर्दा ज्यादै नै हानिकारक भएको छ । त्यसैले गर्दा ललितपुरको धेरैजसो ठाउँमा वान–वे र साइकल लेन बनाउने र यसको राम्रो व्यवस्थापन गर्न काम अगाडि बढाइसकेका छौं ।’

एक प्रसङ्गमा महानगरपालिकाका प्रमुख महर्जनले सवारी दुर्घटना न्यूनीकरण र ट्राफिक व्यवस्थापन चुस्तदुरुस्त बनाउन ई–भेहिकललाई पनि प्रोत्साहन गर्ने घोषणा गरे ।

उनले भने, ‘नेपाल सरकारले २०४० सम्म पेट्रोल, डिजेलबाट चल्ने सवारीसाधनलाई विस्थापित गर्ने नीति लिएको छ । सोही अनुरूप ललितपुर महानगरले अब ई–भेहिकल मात्र किन्छ । जसको शुरूआत मबाटै भएको छ । मैले चढ्ने गाडी ई–भेहिकल हो ।’ 

उनले थपे, ‘ललितपुर महानगरले ४ वटा ई–बस खरिद गरिसकेको छ । जुन १५–१५ मिनेटको फरकमा शहरको भित्री कोर एरियामा चल्नेछ ।’

कार्यक्रमका अर्का अतिथिका रूपमा रहेका ललितपुर महानगरपालिकाका उपमेयर मन्जरी शाक्यले महानगरभित्र जो कोही पनि आउँदा शहरमा सहज आवागमन र भिन्न देखियोस् भन्नेमा महानगर अझ सक्रिय रूपले लाग्ने बताइन् ।

ललितपुर महानगर प्रमुख चिरिबाबु महर्जनले हालसम्म ट्राफिक व्यवस्थापनमा गरेका मुख्य कामहरूको जानकारी बुँदागत रूपमा दिएका छन् ।