कर्णाली प्रदेशसभा बैठक स्थगित भएको छ ।

बैठक बिहीवार दिउँसो १ बजेका लागि तोकिएको थियो ।

प्रदेश सभामुख राजबहादुर शाहीको अध्यक्षतामा बिहीवार बसेको सर्वदलीय बैठकमा सत्ता साझेदार दलहरूका नेता र प्रमुख प्रतिपक्षी दल नेकपा एमाले सहमतिको नजिक नपुग्दा बैठक स्थगित भएको प्रदेशसभा सचिवालयका सचिव जीवराज बुढाथोकीले जानकारी दिए ।

सचिव बुढाथोकीले बिहीवारै सूचना टाँसेर बैठक स्थगित भएको जानकारी दिए ।

‘प्रदेश सरकार र प्रमुख प्रतिपक्षी दलबीचको सहमतिको मस्यौदा बनेको छ,’ उनले भने, ‘तथापि सहमतिको मस्यौदाले भोलि मात्र पूर्णता पाउने भएकाले बैठक आजका स्थगित गरिएको हो ।’

शुक्रवार बिहान ८ बजे पुनः सर्वदलीय बैठक बसेर र त्यसपछि प्रदेशसभा बैठक दिउँसो १ बजे बस्ने गरी तयारी गरिएको सचिव बुढाथोकीले जानकारी दिए ।

प्रतिपक्षी एमालेले आगामी आव २०७९/०८० को बजेटको किताब तथ्यपरक ल्याउनुपर्ने, मुख्यमन्त्री रोजगार कार्यक्रमको कार्यविधि सच्याउनुपर्ने र बजेटमा समेटिएका सुदूरपश्चिमका ३ जिल्ला कर्णालीको बजेटमा हटाउनुपर्ने माग राख्दै प्रदेश सभाको १८औं बैठकमा अवरोध गरेपछि असार १२ गतेदेखि बैठक चल्न सकेको छैन ।