अख्तियार दुरुपयोग अनुसन्धान आयोगले ताप्लेजुङका मालपोत अधिकृत लेखा पनेरु महतले १ लाख ५० हजार रुपैयाँ घुस लिई भ्रष्टाचार गरेको आरोपमा विशेष अदालतमा आरोपपत्र दायर गरेको छ ।

अख्तियारका प्रवक्ता श्यामप्रसाद भण्डारीले शुक्रवार प्रेस विज्ञप्ति जारी गर्दै महतलाई घुस लिइसकेको अवस्थामा पक्राउ गरिएको जनाएका छन् ।

विज्ञप्तिमा उल्लेख छ, ‘अख्तियार दुरुपयोग अनुसन्धान आयोग टंगालबाट खटिई  गएको टोलीले निज मालपोत अधिकृत (कार्यालय प्रमुख) लेखा पनेरु महतलाई सेवाग्राहीबाट रु.१,५०,०००।– (एक लाख पचास हजार रुपैयाँ) घुस/रिसवत लिइसकेको अवस्थामा मिति २०७९।०१।११ गते नियन्त्रणमा लिइएको थियो । अनुसन्धानको सिलसिलामा मालपोत कार्यालय, ताप्लेजुङमा कार्यरत मालपोत अधिकृत लेखा पनेरु महतले जग्गा दाखिल खारेज गर्ने प्रयोजनको लागि घुस/रिसवत माग गरी सेवाग्राहीबाट रु.१,५०,०००।– घुस/रिसवत लिएको पुष्टि हुन आएकोले निज मालपोत अधिकृत लेखा पनेरु महतको उक्त कार्य भ्रष्टाचार निवारण ऐन, २०५९ को दफा ३ को उपदफा (१) को कसुर भएको हुँदा निजलाई बिगो रु.१,५०,०००।– (एक लाख पचास हजार रुपैयाँ) कायम गरी भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को देहाय (घ) बमोजिम सजाय हुन मागदाबी लिई अख्तियार दुरुपयोग अनुसन्धान आयोग ऐन, २०४८ को दफा १८ र ३५ तथा भ्रष्टाचार निवारण ऐन, २०५९ को दफा ३६ बमोजिम आज विशेष अदालत काठमाडौंमा आरोपपत्र दायर गरिएको छ ।’