जनता समाजवादी पार्टीका संघीय परिषद् अध्यक्ष डा. बाबुराम भट्टराईले नयाँ पार्टी बनाउने प्रस्ताव गरेका छन् ।

केन्द्रीय समितिको विस्तारित बैठकमा उनले प्रस्तुत गरेको राजनीतिक प्रतिवेदनमा उक्त कुरा उल्लेख गरेका हुन् ।

जसपाको वैधानिक बहुमत रहे वा नरहेको दुवै अवस्थामा पार्टीको पुनर्गठनका लागि नयाँ पार्टी बनाउने प्रस्ताव गरेका छन् ।

'दुई दिनको उक्त बैठकले निकालेको निष्कर्षमा पार्टीको घोषणापत्र, विधान, नियमावली र आचारसंहिता निर्माण गरी सोही बमोजिम यसलाई वैधानिकता दिने प्रक्रिया पूरा हुनेछ,' भट्टराईले प्रस्तुत गरेको लिखित राजनीतिक प्रतिवेदनमा उल्लेख छ ।

नयाँ बन्ने पार्टीका लागि दुई विकल्प समेत उनले प्रस्तुत गरेका छन् । पहिलो विकल्पमा नयाँ ढंगले वैकल्पिक राजनीतिक शक्ति निर्माणको अभियानलाई अघि बढाउने उल्लेख गरेका छन् ।

विचार, नीति, कार्यक्रम मिल्ने निकटतम शक्तिहरूसँग सहकार्य, ध्रुवीकरण तथा एकीकरण गर्दै जाने दोस्रो विकल्प पनि उनले प्रस्तुत गरेका छन् ।

उक्त दुई विकल्प मध्ये एक विकल्पमा नयाँ पार्टी बनाएर जाने उनले उल्लेख गरेका छन्।