अख्तियार दुरुपयोग अनुसन्धान आयोगले पर्सा जिल्लाको एक विद्यालयका प्रधानाध्यापक, विद्यालय भवन निर्माण समिति अध्यक्षसहित ३ जनाविरुद्ध भ्रष्टाचारको मुद्दा दर्ता गरेको छ । अख्तियारका प्रवक्ता श्यामप्रसाद भण्डारीका अनुसार साविक भेडिहारीस्थित रामजानकी नेपाल राष्ट्रिय प्राथमिक विद्यालयको विद्यालय भवन निर्माण समितिका अध्यक्ष र प्रधानाध्यापक समेतले विद्यालयमा प्राप्त विभिन्न शीर्षकको रकम हिनामिना गरेको देखिएपछि मुद्दा दर्ता गरिएको हो ।

समितिका अध्यक्ष कन्हैया साह कानु, प्रधानाध्यापक तथा सदस्य सचिव रामवचन प्रसाद र सदस्य रामचन्द्र साह कानुले समितिका अध्यक्ष कन्हैया साह कानुलाई नै अस्वभाविक रूपमा रकम पेश्की उपलव्ध गराएको कुरा अनुसन्धानबाट खुलेको अख्तियारका प्रवक्ता भण्डारीले जनाएका छन् ।

निर्माण समितिका अध्यक्ष कन्हैया साह कानुले लिएको पेश्की रकम ११ लाख ९५ हजारबाट विद्यालय निर्माणको कुनै कार्य नगरेको तथा पेश्कीबापतको रकम हालसम्म विद्यालयको खातामा दाखिलासमेत नगरी भ्रष्टाचार गरेको अभियोगपत्रमा उल्लेख छ ।