जनता समाजवादी पार्टी (जसपा) लगभग विभाजित भइसकेको छ । उपेन्द्र यादव र डा. बाबुराम भट्टराई पक्षले अलग–अलग केन्द्रीय समिति बैठक सम्पन्न गरिसकेका छन् । 

डा. भट्टराई पक्षको बैठक असार २८ र २९ गते काठमाडौंमा र यादव पक्षको बैठक २९ र ३० गते वीरगन्जमा सम्पन्न भएको छ । यादव पक्षले संघीय परिषद् अध्यक्ष रहेका डा. बाबुराम भट्टराईसहितका नेताहरूलाई जिम्मेवारीबाट मुक्त गर्ने निर्णय गरेको छ । यादव पक्षले डा. भट्टराईको ठाउँमा संघीय परिषद् अध्यक्षमा वरिष्ठ नेता अशोक राईलाई मनोनयन गर्ने निर्णय गरिसकेको छ । 

पार्टीबाट निष्कासनको कारबाही गरिसकेका यादवले डा.भट्टराईलगायतका नेताहरूलाई पार्टीमा फर्किन आह्वान गरेका छन् । केन्द्रीय समिति बैठकको निर्णय सार्वजनिक गर्न शुक्रवार वीरगन्जमा आयोजित पत्रकार सम्मेलनमा अध्यक्ष यादवले डा. भट्टराईलगायतका नेताहरूका लागि गेटमा ताल्चा नै भने नलगाएको बताएका छन् । डा. भट्टराईसहितका नेताहरूले पुनर्विचार गरेमा पार्टी एक हुनसक्ने उनको भनाइ छ । ‘त्यो गलत बाटो, सोच, चिन्तनलाई त्याग्नुस्, मूलधारको राजनीतिमा आउन चाहनुभयो भने त्यसका लागि गेटमा ताला लगाएका छैनौँ,’ उनले भने । 

पत्रकार सम्मेलनमा अध्यक्ष यादवले डा. भट्टराईसँग विचार र कार्यशैली नमिलेकाले सहमति मै अलग भएको पनि बताएका छन् । तर, जसपा फुटाउने उनीहरूको सपना पूरा हुन नदिइने यादवको भनाइ छ । उनले भने, ‘हाम्रो बैठकमा दुईतिहाइ सदस्य सहभागी भएपछि पार्टी विभाजन गर्ने उहाँको सपना चकनाचुर भएको छ ।’

अध्यक्ष यादवले हालको सत्ता गठबन्धनलाई आगामी निर्वाचनसम्म निरन्तरता दिइने बताएका छन् । आगामी संघ र प्रदेशको निर्वाचनसम्म गठबन्धन कायम राख्ने निर्णय भएको उनले जानकारी दिए ।