संघीय समाजवादी पार्टी (जसपा)का अध्यक्ष उपेन्द्र यादवले नेपालको राजनीति अस्थिर बन्नुमा भूराजनीतिकको प्रभाव पनि भएको बताएका छन् । नेपालको राजनीतिलाई बाह्य शक्तिले सधैं अस्थिर बनाउन चाहने गरेको उनको आरोप छ । नेपालको राजनीतिमा धेरै पहिलेदेखि नै भूराजनीतिको प्रभाव देखिएको उनको भनाइ छ । 

शनिवार नेपाल चीन मैत्री समाजले आयोजना गरेको ‘नेपालको भूराजनीतिक अवस्था’ विषयक अन्तरक्रियामा उनले बाह्य शक्तिकै कारण आफूले सरकारबाट बाहिरिनु परेको स्मरण गरे । नेकपा एमालेका अध्यक्ष केपी शर्मा ओली प्रमुख अतिथि रहेको कार्यक्रममा उनले ओली नेतृत्वको सरकारबाट बाह्य शक्तिको दबाबकै कारण सरकारबाट बाहिरिनु परेको बताएका हुन् । उनी ओली सरकारमा स्वास्थ्यमन्त्री थिए । 

उनले आफू मात्र होइन ओली पनि बाह्य शक्तिकै कारण सरकारबाट बाहिरिनु परेको बताएका छन् । ओलीप्रति लक्षित गर्दै उनले भने, ‘म उहाँको क्याविनेटमा मन्त्री थिएँ, बाह्य शक्तिकै कारण म पूर्व भएँ । म पूर्व भएको केहीदिनमै उहाँ पनि पूर्व हुनुभएछ ।’ 

उनले यसमा आन्तरिक कारण केही भएपछि बाह्य भूराजनीतिक कारण भएको स्वीकार गरेका छन् । ‘हामी सरकारबाट बाहिरिनुमा केही आन्तरिक कारण होलान्, तर, यसमा बाह्य भूराजनीतिको प्रभाव पनि जोडिएको छ ।’

ओली सरकारको बहिगर्मनका लागि आन्दोलन गर्नेमध्ये जसपा पनि एक थियो ।  ओलीलाई आफू नेतृत्वको सरकारलाई हटाउनका लागि विदेशी शक्तिको हात रहेको बताउँदै आएका थिए । 

उनले अहिले नेपालको राजनीति धेरै अस्थिर रहेको बताउँदै यो पनि भूराजनीतिकै प्रभाव भएको बताएका छन् । उनले नेपालका दलहरूले बाह्य शक्तिको प्रभावलाई कम गराउनुपर्ने बताए । ‘यहाँका आन्तरिक शक्तिहरूमा बाह्य शक्तिको आशिर्वाद भए अनन्तकालसम्म राज्य गर्न सकिन्छ भन्ने मानसिकता अन्त्य नभएसम्म राष्ट्रिय स्वार्थको रक्षा गर्न सकिँदैन,’ उनले भने ।