नेकपा माओवादी केन्द्रका अध्यक्ष पुष्पकमल दाहाल प्रचण्डले डा. बाबुराम भट्टराई र माधव नेपालसँग पार्टी एकताको प्रस्ताव गरेका छन् । 

जनता समाजवादी पार्टीबाट बाहिरिने क्रममा रहेका डा. बाबुराम भट्टराईले नयाँ पार्टी दर्ताको प्रयास गरिरहेका छन् । प्रचण्डले माओवादी केन्द्रमा आउन गरेको प्रस्ताव बाबुराम भट्टराईले अस्वीकार गरेपछि सँगै नयाँ पार्टी बनाउने बारे भट्टराईले प्रस्ताव गरेको स्रोतले बताएको छ । 

प्रचण्डले नेकपा समाजवादी केन्द्र बनाएर जाने बारेमा डा. भट्टराईसँग छलफल गरेका छन् । बुधबार विहान ९ बजेदेखि ११ बजेसम्म प्रचण्ड र डा. भट्टराई हात्तिवनस्थित प्रचण्डको भान्जा गोकुल भण्डारीको अपार्टमेन्टमा पार्टी एकताबारे छलफल भएको थियो । 

कम्युनिष्ट विचारधाराको पार्टीमा नरहने बताउँदै आएका डा. भट्टराईले भने प्रचण्डको प्रस्ताव पछि सल्लाह गरेर जवाफ दिने प्रतिक्रिया दिएको स्रोतले बताएको छ । 

माधव नेपाल नेतृत्वको एकीकृत समाजवादी र माओवादी केन्द्र समान एजेण्डा लिएर अघि बढेको र समाजवादी केन्द्र बनाउँदा उनीहरूलाई पनि समेट्न सकिने बारेमा प्रचण्ड र भट्टराईबीच छलफल भएको बताइएको छ । 

यसअघि प्रचण्डले माधव नेपालसँग समाजवादी केन्द्रलाई पार्टी बनाएर जाने गरी माओवादी केन्द्र र एकीकृत समाजवादीको एकीकरणको प्रस्ताव गरिसकेको समाजवादी केन्द्रका नेताहरू बताउँछन् । 

समाजवादी केन्द्रका नेताहरू भने अहिल्यै पार्टी एकता भन्दा पनि विभिन्न पार्टीहरूको मोर्चा बनाएर जानुपर्ने पक्षमा छन् । 

यता भट्टराईले पनि प्रचण्डसँगको बुधबारको छलफल सकरात्मक रहेको भन्दै अहिले आफूनिकटका नेताहरूसँग प्रचण्डको प्रस्तावबारे छलफल गरिरहेको स्रोतले बताएको छ । 

एकीकृत समाजवादी, माओवादी केन्द्र र डा. भट्टराई सहितको छलफल विहीवार हुन सक्ने उनीहरूनिकट नेताहरूले बताएका छन् । तर, अहिलेसम्म भेट्ने समय र ठाउँ भने निश्चित भइनसकेको बताइएको छ ।