रूपन्देहीमा कल सेन्टरको आवरणमा ठगी धन्दा हुने गरेको खुलेको छ । 

तिलोत्तमा नगरपालिका वडा नम्बर २ जानकीनगरस्थित ब्लू स्काई कल सेन्टर स्थापना गरी त्यहाँबाट ठगी गर्ने गिरोहको ‘नेटवर्क’ सम्म प्रहरी पुग्न सफल भएको छ । 

जिल्ला प्रहरी कार्यालय, रूपन्देही प्रमुख एसपी रवीन्द्र रेग्मीले नेपालमा कल सेन्टर स्थापना गरी भारतमा ठगी धन्दा गर्ने नेटवर्क रहेको प्रारम्भिक अनुसन्धानले देखाएको बताए । 

तर, नियन्त्रणमा नेटवर्कबाट कहाँ–कहाँ ठगी धन्दा र ‘ब्ल्याकमेलिङ’  भइरहेको भन्नेमा अनुसन्धान भइरहेको एसपी रेग्मीको भनाइ छ । 

उनीहरूले मुख्य गरेर इन्टरनेटबाट व्यक्तिको विस्तृत विवरण पहिचान गर्ने र उनीहरूको कम्प्युटरमा सन्देश पठाउने गरेको देखिन्छ । 

कल सेन्टरका १ जना भारतीय नागरिक सहित ९ जना सञ्चालक र त्यहाँ काम गर्ने १५० जनाभन्दा बढी किशोर/किशोरीलाई आइतवार नियन्त्रणमा लिएको जानकारी एसपी रेग्मीले जानकारी दिए । 

हालसम्म प्रहरीले गरेको प्रारम्भिक अनुसन्धानमा प्रमुख निशानामा भारतीय नागरिक देखिएको उनको भनाइ छ ।

‘सर्वसाधारणको मोबाइलमा ह्वाट्सप र फेसबुकमा अश्लील म्यासेज पठाउने तथा चिठ्ठा पर्‍यो भन्दै ठगी गर्ने गरेको प्रारम्भिक अनुसन्धानको क्रममा खुलेको छ,’ एसपी रेग्मीले भने, ‘त्यसको प्रमुख नाइके भारतीय र अन्य केही नेपालीहरू पनि रहेको बुझिएको छ ।’ 

४ तल्लाको घरमा ३ वटा ‘फ्ल्याट’ भाडामा लिएर ३०० कम्प्युटर राखेर त्यसकै माध्यमबाट सर्वसाधारणलाई म्यासेज पठाइने गरेको खुलेको प्रहरीले जनाएको छ । 

बेरोजगार युवाहरूलाई जब लिंक रहेको जानकारी दिन उनीहरुलाई काममा लगाइएको थियो । उनीहरूलाई मासिक १० हजारदेखि ४० हजारसम्म तलब दिने गरेको पक्राउ परेकाहरूले बताएका छन् । 

उनीहरूले ह्वाटसपमार्फत फोन गर्ने । फोनबाट त्यसबाट फोन गर्ने व्यक्तिको डिटेल लिने र व्यक्तिको उसको फोटा ‘नेगलेट’ अश्लिल बनाउने र हवाटसपमार्फत तानेका नम्बरमा आफन्तलाई पठाइदिएर पैसाको मोलमोलाइ गर्ने बुझिएको छ । 

उक्त कल सेन्टर लामो समयदेखि सञ्चालनमा रहेको बुझिएको प्रहरीले जनाएको छ । 

प्रहरीका अनुसार, सो कलसेन्टरबाट नेपालीहरू भने पीडित भएको पाइएको छैन ।  

प्रहरी अन्य विस्तृत अनुसन्धानको लागि सबै क्षेत्रमा परिचालित भएको इलाका प्रहरी कार्यालय बुटवलका डिएसपी ठगबहादुर केसीले बताए ।