आगामी ३ महिनाभित्रै मुद्रास्फीति (महँगीदर) १४ प्रतिशत पुग्ने भएको छ । नेपाल राष्ट्र बैंकले असार २० देखि २७ सम्ममा गरेको मुद्रास्फीति अपेक्षा सर्वेक्षणले हालको ९ प्रतिशतभन्दा कमको मूल्यवृद्धि एकैपटक १४ प्रतिशत पुग्ने अनुमान गरेको छ । यस्तो मुद्रास्फीति दर चालू आर्थिक वर्षभित्र १३.५ प्रतिशतभित्र सीमित गर्न सकिने राष्ट्र बैंकको उक्त सर्वेक्षण प्रतिवेदनमा उल्लेख छ । 

राष्ट्र बैंकले विभिन्न २८ शहरका ३१ बजार क्षेत्रका व्यक्तिहरूसँग अन्तर्वार्ता मार्फत गरेको उक्त सर्वेक्षण प्रतिवेदन अनुसार महँगीदर अर्थात मूल्यवृद्धि अस्वभाविक रूपमा बढिरहेको देखाएको छ । राष्ट्र बैंकले ११ सय ४१ शहरी व्यक्तिहरूको प्रतिक्रियाका आधारमा उक्त सर्वेक्षण प्रतिवेदन तयार पारेको जानकारी दिएको छ । 

सरकारले चालू आवको बजेट तथा राष्ट्र बैंकको मौद्रिक नीतिले भने मुद्रास्फीति दर ७ प्रतिशत भित्रै राख्ने अनुमान गरेको छ । सरकारी लक्ष्य र केन्द्रीय बैंकले तय गरेको लक्ष्यभन्दा व्यवहारिक रूपमा भने बजारमा महँगी धेरै रहेको यस सर्वेक्षण प्रतिवेदनले औँल्याएको छ । यसै प्रतिवेदनका आधारमा चालू आवमा सरकारको तथा केन्द्रीय बैंकको मूल्यवृद्धि लक्ष्य असफल हुने आव शुरू भएकै महिनाबाट देखिएको छ ।​