महिला, बालबालिका तथा जेष्ठ नागरिकमन्त्री उमा रेग्मीले वृद्ध बुवा आमालाई गर्नुपर्ने स्याहार सुसार नगरी अंश खाने प्रवृत्ति निरुत्साहित गर्न सरकारले जेष्ठ नागरिक विधेयक ल्याएको बताएकी छन् । विधेयक पारित भएसँगै आमा बुवालाई हेला गरेर अंश हत्याउने दिनको अन्त्य हुने उनले बताइन् । 

जेष्ठ नागरिक विधेयकमाथि राष्ट्रिय सभामा भएको सैद्धान्तिक छलफलमा उठेका प्रश्नको जवाफमा मन्त्री रेग्मीले आमा बुवालाई उचित स्याहार नगर्नेले अंशमा दाबी गर्न नपाउने व्यवस्था कानूनमा गरिएको बताएकी हुन् । प्रतिनिधि सभाबाट पारित यो विधेयक राष्ट्रिय सभाबाट अनुमोदन भएपछि कानून बन्ने छ ।

‘आफू शहर, बजार र विदेशमा बसेर गाउँका बुवा आमालाई स्याहार नगर्ने, तर सम्पत्ति हात पार्न खोज्ने प्रवृत्ति अब निरुत्साहित हुनेछ’ रेग्मीले भनिन्, ‘आफूमाथि अपमान गरेको कुरा वृद्धवृद्धाले मात्र नभई छिमेकीले उजुरी दिए पनि कारबाही हुने व्यवस्था कानूनमा छ ।’