पूर्व प्रधानमन्त्री डा. बाबुराम भट्टराईले यस अघि आँखा चिह्न हाेल्ड गरेकाे समावेशी लोकतान्त्रिक पार्टीलाई नेपाल समाजवादी पार्टी बनाएर निर्वाचन आयोगमा अपडेट गराएका छन् । 

जनता समाजवादी पार्टी (जसपा)ले कारबाही गरेपछि दलविहीन भएका उनले आफ्नाे नेतृत्वमा समाजवादी पार्टी बनाएका हुन् । 

केहीदिन पहिले दल दर्ताका लागि आयोगमा निवेदन दिएको र आयोगले बिहीवार दल दर्ता भएको जानकारी गराएको उनीनिकट विश्वदीप पाण्डेले जानकारी दिएका छन् । ‘केहीदिन पहिले आयोगमा दल दर्ताका लागि निवेदन दिएका थियौँ’, पाण्डेले भने, ‘आयोगले आज दल दर्ता भएको जानकारी गराएको छ ।’ उनले पदाधिकारीको विषयमा केही खुलाएनन् । उनले आयोगमा पार्टीका विधान बुझाइएको जानकारी दिए । 

डा. भट्टराईको पार्टीको चुनाव चिह्न ‘आँखा’ रहने पाण्डेले बताए । नेकपा माओवादी केन्द्रबाट अलग भएपछि डा. भट्टराईले नयाँ शक्ति पार्टी दर्ता गराएका थिए । उक्त पार्टीको निर्वाचन चिह्न पनि आँखा नै रहेको थियो । डा. भट्टराईले २०७४ सालकाे चुनावमा आँखा चिह्न लिएर नै भाग लिएका थिए । 

तर, जसपासँग एकीकृत भएपछि उनको निर्वाचन चिह्न राखेर दीपक लामिछानेले समावेशी लोकतान्त्रिक पार्टी गठन गरेका थिए । त्यसबेला डा.भट्टराईकै निर्देशनमा लामिछानेले उक्त दल निर्वाचन आयोगमा दर्ता गराएको चर्चा चलेको थियो । 

डा. भट्टराईले बिहीवार नै लामिछानेसहितका नेताहरूसँग पनि छलफल गरेका थिए ।