राष्ट्रिय जनमोर्चाका अध्यक्ष चित्रबहादुर केसीले नागरिकता विधेयक ल्याएर सरकारले राष्ट्रघात गरेको आरोप लगाएका छन् । विदेशीलाई नागरिकता दिनका लागि खुकुलो ल्याइएको नागरिकता विधेयकले देश लज्जित हुने अवस्थामा पुगेको उनको भनाइ थियो । 

राष्ट्रिय जनमोर्चाको तर्फबाट स्थानीय तहमा निर्वाचित जनप्रतिनिधिका लागि शुक्रबारदेखि बुटवलमा शुरू भएको प्रशिक्षण कार्यक्रम उद्घाटन गर्दै केसीले गैर नागरिकलाई नागरिकता दिने गरी आएको विधेयकले मुलुकलाई ठूलो संकटमा फसाउने दाबी गरे । 

‘नागरिकता विधेयकका कारण भविष्यमा हामी नेपाली अल्पमतमा पर्ने सम्भावना छ’ केसीले भने, ‘यसको असर केही समयपछि देखिन्छ । यसले देशको अस्तित्वमाथि प्रश्न चिन्ह खडा भयो । सत्तामा विदेशीको इसारामा नागरिकता विधेयक सदनबाट पास भयो ।’

संघीयता, नागरिकता विद्येयक, एमसीसी, महँगी, भ्रष्टाचार, विभिन्न प्रकारका हिंसा र अपराधविरूद्व जनमोर्चाले निरन्तर संघर्ष गर्दै आएको केसीले बताए । संघीयताका कारण मुलुक टाट पल्टिएको अवस्थामा एमसीसी, राष्ट्रघाती नागरिकता विधेयकले देश झनै संकटमा परेको उनको भनाइ थियो । 
 
पूर्व उपप्रधानमन्त्रीसमेत रहेका अध्यक्ष केसीले सत्तामा रहेका आफूलाई ठूला भन्ने दलका नेताहरूले राजनीतिलाई व्यवसाय बनाएर देशलाई कंगाल बनाएको आरोप लगाए ।  पार्टीको अनुशासनमा रहेर जनताको हितमा जनपक्षीय काम गरेर व्यवहारमा देखाउन उनले जनप्रतिनिधिहरूलाई आग्रह गरे ।