शोभित बस्नेतको ‘बद्री बहादुर’ अष्ट्रेलियामा प्रिमियर

शोभित बस्नेत निर्देशित चलचित्र ‘बद्री बहादुर’ अष्ट्रेलियामा प्रिमियर गरिएको छ । शनिवार अष्ट्रेलियामा चलचित्र प्रिमियर गरिएको हो । नेपाल रिलिज अगाडि विदेशबाट चलचित्र प्रदर्शनको शुरूवात निर्देशक बस्नेतले गरेका हुन् । अष्ट्रेलिया प्रिमियरबाट चलचित्रलाई सुखद् प्रतिक्रिया मिलेको छ । दर्शक प्रतिक्रियाबाट आफू उत्साहित रहेको निर्देशक बस्नेतले बताएका छन् । 

चलचित्र रिलिजको लागि शोभित केही समयअघि अष्ट्रेलिया उडेका थिए । चलचित्रको सिड्नी रिलिजको चाँजोपाँजो मेगा इभेन्ट र रुक्सल प्रजापतिले मिलाएका हुन् । अझै तीन शहरमा समेत चलचित्रको प्रिमियर गरिनेछ । नेपालमा भने चलचित्र चाँडै रिलिज हुनेछ । 

चलचित्रमा अभिनेत्री पूजा शर्मा र अभिनेता सलोन बस्नेत विशेष भूमिकामा रहेका छन् । ‘बद्री बहादुर’मा जय किशन बस्नेत, छुल्ठिम गुरुङ, राजिवजंग बस्नेत, धिरेन शाक्य  र वर्षा चौलागाईको अभिनय रहेको छ । यही चलचित्रबाट एलिना गुरुङ नेपाली चलचित्रमा डेव्यू गरेकी छन् ।

सञ्चारकर्मी रवि अधिकारी कार्यकारी निर्माता रहेको चलचित्र एबि पिक्चर्स फार्म र सलोन सलिना ब्यानरमा निर्माण भएको हो । चलचित्रका प्रस्तुतकर्ता विजय गोपाल दली हुन् भने निर्माता मिथुन भोटे रहेका छन् ।

चलचित्रमा टंक बुढाथोकी र उजन नेम्वाङको संगीत, रामकाजी घिमिरेको लेखन, शिव विकको नृत्य निर्देशन, शंकर महर्जनको द्वन्द्व निर्देशन रहेको छ । विनोद सापकोटाको छायांकन तथा समिर मियाको सम्पादन रहेको ‘बद्री बहादुर’मा मुख्य सहायक निर्देशक रामजी राउत हुन् । ‘बद्री बहादुर’ कमेडी जनरामा निर्माण भएको चलचित्र हो ।