एजुकेशन कन्सल्टेन्सीको ब्रान्ड एम्बास्डर बनिन् नम्रता

मोडल तथा अभिनेत्री नम्रता सापकोटा एजुकेशन कन्सल्टेन्सीको ब्रान्ड एम्बास्डरमा अनुबन्ध भएकी छन् । नम्रता विदेशमा अध्ययन गर्न चाहने विद्यार्थीहरूलाई लक्षित गर्दै सञ्चालनमा आएको इन्स्टा एजुकेशनल कन्सल्टेन्सी एन्ड भिसा सर्विसेजको ब्रान्ड एम्बास्डरमा अनुबन्ध भएकी हुन् । 

आइतवार एक कार्यक्रमबीच कन्सल्टेन्सी र नम्रताबीच सम्झौता पत्र आदान–प्रदान भएको छ । उनी ब्रान्ड एम्बास्डरमा अनुबन्ध हुनुअघि कन्सल्टेन्सीको नेपाल कार्यालय उद्घाटन गरिएको थियो । एजुकेशन कन्सल्टेन्सी एशोसियस अफ नेपाल (इक्यान) का अध्यक्ष प्रकाश पाण्डेले रिवन काटेर पुतलीसडकमा रहेको स्टार मलको चौथौं तल्लामा अवस्थित कन्सल्टेन्सीको उद्घाटन गरेका थिए ।

ब्रान्ड एम्बास्डर अनुबन्ध भएपछि नम्रताले आफूमाथि जिम्मेवारी थपिएको बताइन् । आफूले बोल्दा कसैको जीवन र करिअरसँग सम्बन्धित हुने भएकाले राम्ररी बुझेर, सोँचेर र सम्झेर मात्र ब्रान्ड एम्बास्डर बन्ने निर्णय गरेको उनको भनाइ छ ।

उनले भनिन्, ‘बाहिर जाने कुरा एउटा व्यक्तिको जीवन र करिअरसँग जोडिन्छ । विदेश जाने निर्णय गर्दा जिन्दगीको स्वर्णिम चिजहरु जम्मा गरेर आफ्नो जिन्दगी अगाडि बढाउनु पर्छ । आजबाट मेरो अझ जिम्मेवारी बढेको महसुस भएको छ । किनकि, अब मेरो हरेक बोलीमा कसैको जीवन र करिअर जोडिएको हुन्छ । त्यसैले यो जिम्मेवारी एकदमै गाह्रो छ । विद्यार्थीहरूलाई सही मार्गनिर्देशन गर्न म सञ्चालकहरूलाई सधैं झकझकाइरहनेछु ।’

कन्सल्टेन्सीका निर्देशक तथा अष्ट्रेलियाका इमिग्रेशन एजेन्ट हिरा कँडेलले विगत लामो समयदेखि अष्ट्रेलियाबाट सेवा प्रदान गर्दै आएको भए पनि अब नेपालबाट विद्यार्थीहरुलाई अष्ट्रेलिया लगायतका राष्ट्रमा सहयोग गर्न कार्यालय खोलेको बताए । 

कन्सल्टेन्सीको कार्यालय उद्घाटन कार्यक्रममा गायक थानेश्वर गौतम, निर्देशक सुव्रतराज आचार्य, गायिका रीतु कँडेललगायतको उपस्थिति रहेको थियो ।