फ्राइडे रिलिजअन्तर्गत शुक्रबार तीन नयाँ चलचित्र रिलिज भएका छन् । एउटा नेपाली चलचित्रले भने तेस्रोपटक प्रदर्शन थालनी गरेको छ । 

नेपाली चलचित्र ‘म’, हलिउड चलचित्र ‘बुलेट ट्रेन’ र भारतीय चलचित्र ‘रामराव अन ड्युटी’ शुक्रबारदेखि प्रदर्शनमा आएका हुन् । ‘चपली हाइट–३’ पनि तेस्रोपटक प्रदर्शनमा आएको छ । 

सुवर्ण थापा निर्देशित चलचित्र ‘म’ कान्तिपुर फिल्म एकेडेमीले निर्माण गरेको हो । चलचित्रमा निशा अधिकारी, निराजन प्रधान, सबिन श्रेष्ठ, संजोग रसाइली, सरोज खनाल, सरिता लामिछानेलगायतको मुख्य भूमिका छ । ‘म’ अस्पतालमा भर्ना हुने एक शंकास्पद बिरामीको कथामा चलचित्र निर्माण गरिएको हो । १ घण्टा ५५ मिनेट लामो चलचित्रलाई सस्पेन्स, थ्रिलर र ड्रामा जनरामा राखिएको छ । 

निकेश खड्का निर्देशित ‘चपली हाइट–३’ गतवर्ष पुस ३० गते पहिलोपटक प्रदर्शनमा आएको थियो । तर, त्यसको ३ दिनमै कोरोना भाइरसका कारण हल बन्द हुँदा प्रदर्शन स्थगित हुन पुगेको थियो । फागुन १ गतेदेखि चलचित्र दोस्रोपटक प्रदर्शनमा आएको थियो । कोरोनाका कारण एक महिना हल बन्द भएर खुलेपछि दोस्रो पटक प्रदर्शनमा आएका कारण त्यसपटक पनि चलचित्र हेर्न हलमा दर्शकहरू पुगेनन् । 

अर्जुन कुमारको निर्माण रहेको चलचित्रमा स्वस्तिमा खड्का, सुपुष्पा भट्ट, महेश त्रिपाठी, अर्पण थापा, आमिर गौतम, प्रतिकमान श्रेष्ठ, लक्ष्मी बर्देवा लगायतका कलाकारहरूको अभिनय छ । 

आकाश बरालको लेखन तथा संवाद रहेको १ घण्टा ४६ मिनेट लामो चलचित्र क्राइम र थ्रिलर जनरामा निर्माण भएको हो । 

ब्राड पिटको मुख्य भूमिका रहेको हलिउड चलचित्र ‘बुलेट ट्रेन’ एक्सन र थ्रिलर जनरामा निर्माण भएको हो । यता, रवि तेजाको मुख्य भूमिका रहेको दक्षिण भारतीय चलचित्र ‘रामराव अन ड्युटी’ पनि शुक्रबारदेखि रिलिज भएको छ । सरत माण्डवाको निर्देशन रहेको २ घण्टा ३० मिनेट लामो चलचित्रलाई एक्सन, थ्रिल र ड्रामा जनरामा राखिएको छ ।