नेकपा एकीकृत समाजवादी पार्टीका अध्यक्ष माधवकुमार नेपालले केपी शर्मा ओलीको व्यक्तिवादी चरित्रका कारण कम्युनिस्ट आन्दोलन क्षत–विक्षत भएको आरोप लगाएका छन् । एमाले अध्यक्षमा निर्वाचित भएपछि ओलीले आफ्नो वास्तविक चरित्र देखाएको नेपालले टिप्पणी गरे ।

पार्टी स्थापनाको एकवर्ष पुगेको अवसरमा बिहीवार काठमाडौंमा आयोजित कार्यक्रमलाई सम्बोधन गर्दै नेता नेपालले ओलीले कम्युनिस्ट पार्टीलाई आफ्नो पेवा ठान्दा कम्युनिस्ट आन्दोलन विभाजित हुन पुगेको बताएका हुन् ।

‘एकवर्ष अघिसम्म हामी पार्टीभित्रको गुटबन्दीको महारोगविरुद्ध जुध्ने काम गरेका थियौँ । नवौँ महाधिवेशनबाट अध्यक्ष भएपछि ओलीको वास्तविक चरित्र उजागर भएको थियो । ओलीले पार्टीलाई आफ्नो पेवा ठानेर अरुलाई अवमूल्यन गर्न थाले’ नेपालले भने, ‘कम्युनिस्ट आन्दोलनमा एक भारी समस्या छन, व्यक्तिबाट र गुटवाद मुख्य समस्या हो । केपी ओली प्रवृत्ति कम्युनिस्ट आन्दोलनको मुख्य समस्या हो ।’