शुक्रवारदेखि प्रदर्शनमा आउन लागेको फिल्म ‘झिँगेदाउ’को बुधवार बेलुका राजधानीमा प्रिमियर शो गरिएको छ । ज्ञानेन्द्र देउजा निर्देशित फिल्म हेर्न चलचित्र विकास बोर्डका अध्यक्ष भुवन केसी, अभिनेता दीपकराज गिरी, अभिनेत्री एवं निर्देशक दीपाश्री निरौलादेखि स्वस्तिमा खड्का, रीमा विश्वकर्मासम्म बिग मुभिज पुगेका थिए । 

चलचित्र हेरिसकेपछि अधिकांशले यसको कथावस्तु, कलाकारहरूको अभिनय र निर्देशकीयलगायतको पाटोको खुलेर प्रशंसा गरे । 

विकास बोर्डका अध्यक्ष भुवन केसीले ‘झिँगेदाउ’ उत्कृष्ट पारिवारिक फिल्म बनेको बताए । फिल्म हेरिसकेपछि सञ्चारकर्मीलाई प्रतिक्रिया दिँदै उनले भने, ‘फिल्म पारिवारिक, मनोरञ्जनात्मक छ । इमोशनल पनि छ । म्यासेज ओरेन्टेड पनि छ । सबै परिवारले हेर्नुपर्छ भन्ने मलाई लाग्छ ।’ 

धेरैपछि प्रिमियरमा पुगेका अभिनेता दीपकराज गिरीले ‘झिँगेदाउ’ जस्तो फिल्मलाई सबैले साथ र सहयोग गर्नुपर्ने धारणा राखे । उनले यसप्रकारका राम्रा फिल्म कमै बन्ने गरेको र यो फिल्म हेर्न छुटाउन नहुने पनि बताए । ‘प्रस्तुित एकदमै अग्र्यानिक छ । यो फिल्मलाई हामी सबैले सहयोग गर्नुपर्छ । हाम्रो गाउँघर सम्झाउँछ फिल्मले’ दीपकराजले भने, ‘फिल्मले बोर गर्दैन । पैसा खेर जाँदैन ।’

अभिनेत्री तथा निर्देशक दीपाश्री निरौलाले पनि फिल्मलाई अग्र्यानिक भनिन् । उनले धेरैपछि मौलिक र अग्र्गानिक फिल्म हेर्न पाएको बताउँदै कलाकारहरूको काम निकै राम्रो रहेको बताइन् । 

अभिनेता रमेश उप्रेतीले फिल्मले आफूलाई मनमा छोएको बताए । अभिनेत्री स्वस्तिमा खड्काले धेरैपछि अग्र्यानिक, फरक शैलीमा बनेको फिल्म हेर्न पाएको बताइन् । उनले भनिन्, ‘गाउँघरको कथा हुँदाहुँदै पनि कलरफूल र रमाइलो तरिकाले बनाइएको फिल्म छ । एकदमै रमाइलो लाग्यो ।’ उनले अर्गानिक कथालाई कमर्सियल शैलीमा बनाइएको प्रतिक्रिया दिइन् । उनले कलाकारहरूको अभिनयको समेत खुलेर प्रशंसा गरिन् । 

अर्की अभिनेत्री रीमा विश्वकर्माले फिल्म उत्कृष्ट बनेको बताइन् । उनले भनिन्, ‘ज्ञानेन्द्रजी जत्तिको अनुभवी निर्देशकबाट यतिसम्मको फिल्म आउँछ भन्नेमा म विश्वस्त थिएँ । मलाई एकपटक हेरेर मन भरिएको छैन । अब स–परिवार हेर्न आउनेवाला छु ।’ 

अभिनेत्री मिथिला शर्माले पनि फिल्म एकदमै मनपरेको बताइन् । उनले फिल्मकी चरित्र अभिनेत्री हिउँवाला गौतमको खुलेर प्रशंसा गरिन् । ‘फिल्ममा हिउँवाला गौतम बहिनीको साधना छर्लङ्ग देखिएको छ । ज्ञानेन्द्र भाइले अत्यन्तै राम्रो फिल्म बनाउनुभएको छ । सबै टिमलाई बधाई । हाँस्दा–हाँस्दै सबैको मुटु समाइदिनुभयो’, मिथिलाले भनिन् । 

निर्देशक आकाश अधिकारी, नरेश पौड्याल, उज्जवल घिमिरे, मोडल गरिमा शर्मालगायतले पनि फिल्मको खुलेर प्रशंसा गरे । 

भीमनिधी तिवारीको कथा कृतिमा आधारित रहेर निर्माण गरिएको ‘झिँगेदाउ’लाई पुराना निर्देशक ज्ञानेन्द्र देउजाले निर्देशन गरेका हुन् । 

फिल्ममा केकी अधिकारी, मुकुन भुषाल, आँचल शर्मा, कुशल विष्ट, हिउँवाला गौतम, संगम भण्डारी, विजय देउजालगायतको अभिनय छ । प्रिमियरमा फिल्मका अधिकांश कलाकारहरू उपस्थित थिए । 

प्रिमियरमा फिल्मकर्मीबाट प्राप्त प्रतिक्रियाबाट फिल्मप्रति विश्वास अझ बढेको अभिनेत्री केकीले बताइन् । उनले फिल्म इन्टरटेनिङको प्याकेज रहेको बताइन् । केकीले भनिन्, ‘पछिल्लो समय अर्गानिक भनिएको तर इन्टरटेनिङ तत्व नभएको वा इन्टरटेनिङ तत्व भएको तर अर्गानिक कथा नभएको भन्ने कुरालाई ‘झिँगेदाउ’ले पूरा गरेको छ भन्नुभयो सबैले । मैले पनि आज दर्शक भएर हेर्दा त्यही पाएँ ।’ 

अभिनेत्री आँचल शर्माले पनि दर्शक भएर फिल्म हेर्दा एकदमै रमाइलो लागेको प्रतिक्रिया दिइन् । आँचलले भनिन्, ‘म आफैँले दर्शक भएर हेर्दा हरेक पात्र र पात्रको अभिनयले बाँधेर राख्यो । घरभित्र र बाहिरको फ्रेम उत्तिकै सुन्दर छन् । समग्रमा सिंगो फिल्म नै राम्रो र बलियो इन्टरटेनिङ बनेको छ भन्ने लाग्यो ।’ 

अभिनेता मुकुन भुषाल र कुशल विष्टले हलमा आएर मनोरञ्जन लिन चाहने सबैलाई ‘झिँगेदाउ’ हेर्न छुटाउन नहुने बताए ।