नेकपा माओवादी केन्द्रका अध्यक्ष पुष्पकमल दाहाल प्रचण्डले देशका विभिन्न जिल्लाबाट चुनाव लड्नको लागि प्रस्ताव आएपछि चितवन नछाड्ने बताएका छन् । चितवनमा आफ्नो जित सुनिश्चित रहेको उनले दाबी गरे । 

शुक्रवार कास्कीको पोखरामा पत्रकारहरूसँग कुरा गर्दै प्रचण्डले चितवन छाडेर हिँड्दा डराएको जस्तो सन्देश जाने बताएका हुन् । ‘अहिले भर्खर प्लेनमा आउँदा गोरखाका कांग्रेस नेताले चुनाव लड्न आइदिनुपर्‍यो, हामी जिताएर पठाउँछौँ भन्नुभएको थियो’, प्रचण्डले भने, ‘चितवन छाड्दिनँ चितवन छाड्दा राम्रो सन्देश जाँदैन । चितवनमा जित्ने कुरामा पूर्ण विश्वास छ । चितवन छाड्दा डराएर हिँडेको जस्तो अर्थ लाग्छ ।’

प्रचण्डले चुनाव पछि गर्ने भनेको आन्दोलन विद्रोह, क्रान्ति, युद्ध र हिंसात्मक नभई संविधान संशोधन गरेर निर्वाचन प्रणालीमा सुधार गर्ने कुरा भएको दाबी गरे ।