नवौँ राष्ट्रिय खेलकुद प्रतियोगिताको पुरुष क्रिकेटअन्तर्गत एनआरएनए एकेडेमी र एपीएफ क्लवबीचको खेल नतिजाविहीन बन्दा अन्य तीन खेललाई पनि वर्षाले प्रभावित गरेको छ ।

कीर्तिपुर स्थित त्रिभुवन विश्व विद्यालयको मैदानमा शुक्रवार परेको भारी वर्षाको कारण खेल नतिजाविहीन सकिएको हो । सोही वर्षाका कारण सुदूरपश्चिम प्रदेश र बागमती प्रदेशबीचको दोस्रो खेल पनि प्रभावित भयो । उक्त खेल टस नै नभई रद्ध भएको हो । 

वर्षाले खेल रोकिनुअघि एनआरएनएले ब्याटिङ गरिरहेको थियो । १९ ओभरमा घटाइएको खेलमा एनआरएनएले १३ ओभर ३ बलमा २ विकेट गुमाएर १ सय २० रन बनाएको थियो । एनआरएनएका कप्तान सुनाम गौतमले ४५ रन बनाएर अविजित थिए । पृथु बाँस्कोटा २६ रनमा अविजित थिए । 

यस खेल नतिजाविहीन सकिएसँगै दुवै टोलीले एक/एक अंक बाँडेका छन् । यससँगै एनआरएनएले २ खेलमा ३ अंक जोडेको छ । पहिलो खेलमा एनआरएनएले सुदूरपश्चिमलाई हराएको थियो । एनआरएनए समूहको शीर्ष स्थानमा रहेको छ । एपीएफले १ खेलमा १ अंक जोडेको छ ।

वर्षाकै कारण मूलपानी क्रिकेट मैदानमा तय भएका नेपाल पुलिस क्लब र मधेश प्रदेश तथा त्रिभुवन आर्मी र कर्णालीबीचको खेल पनि रद्ध भएको छ । 

गण्डकी प्रदेशमा नवौं राष्ट्रिय खेलकुद असोज २८ देखि कात्तिक ३ सम्म आयोजना हुनेछ । तर, पुरुष क्रिकेट भने अगाडि नै आयोजना भएको हो । प्रतियोगितामा तीन विभागीय, सात प्रदेश तथा एनआरएनको टोली गरी ११ टोलीको सहभागिता रहेको छ । सहभागी ११ टोलीलाई दुई समूहमा विभाजन गरिएको छ ।