निलम्बित प्रधानन्यायाधीश चोलेन्द्रशम्शेर जबरासँग महाअभियोग सिफारिस समितिले बयान लिएर तयार पारिएको प्रतिवेदन शनिवार बुझाउने भएको छ ।

सिंहदरबारमा शुक्रवार बसेको समितिको बैठकले निलम्बित प्रधानन्यायाधीश जबराले पहिलाकै प्रश्नमा केही अस्पष्ट विषयहरू साधेर प्रतिवेदनलाई अन्तिम रूप दिने काम गरिएको र प्रतिवेदन शनिवार बुझाउने तयारी भएको सचिव लक्ष्मीप्रसाद गौतमले जानकारी दिए ।

संसद् आगामी असोज १ गते राति १२ बजे सकिने भएकाले समितिले शनिवार नै संसद्मा प्रतिवेदन बुझाउने तयारी गरेको छ । 

समितिले सर्वोच्च अदालतका बहालवाला न्यायाधीश, पूर्व प्रधानन्यायाधीश, वरिष्ठ अधिवक्ता र अधिवक्तालाई बयानका क्रममा आएको सवालमा प्रश्न गर्नका लागि बोलाउने निर्णय गरे पनि सर्वोच्च अदालतका न्यायाधीश शक्ति पृथकीकरणको सिद्धान्तअनुसार जान नमिल्ने र पूर्व प्रधानन्यायाधीशहरूले पनि आफूहरू जान नमिल्ने पत्र समितिलाई पठाएपछि समितिले वरिष्ठ अधिवक्ता र अधिवक्तासँग मात्र बयान लिएको छ ।

जबराविरुद्ध गत फागुन १ गते प्रतिनिधि सभाका ९८ सांसदले महाअभियोग प्रस्ताव दर्ता गरेका थिए ।