नेकपा एमालेले आगामी मंसिर ४ गते हुने प्रदेश तथा प्रतिनिधिसभा निर्वाचनका लागि निर्वाचन आयोगमा बुझाउनुपर्ने समानुपातिकतर्फका नामावलीको टुंगो आइतबार लगाउने भएको छ । शनिबार एमाले अध्यक्ष केपी शर्मा ओलीको निवास बालकोटमा बसेको केन्द्रीय सचिवालयको बैठकमा समानुपातिक सूचीका सन्दर्भमा सामान्य छलफल भएपनि अन्तिम टुंगो आइतबार लगाउने तय भएको प्रचार विभाग प्रमुख पृथ्वीसुब्बा गुरुङले जानकारी दिए । 

उनका अनुसार बैठकमा महासचिव शंकर पोखरेलले बन्दसूचीमा समेटिनुपर्ने संख्या र कानुनी प्रबन्ध ब्रिफिङ गरेका थिए । ‘बैठकमा महासचिवले प्रतिनिधसभामा सिफारिस गर्नुपर्ने ११० जना नामहरुको कानुनी प्रक्रिया र संख्याबारे जानकारी गराउनुभयो’, बैठकपछि उनले भने, ‘सातवटा प्रदेशमा सिफारिस गर्नुपर्ने २२० जना सदस्यहरुको क्लस्टरवाईज(महिला, दलित, पिछडिएका क्षेत्रलगायत)का बारेमा पनि जानकारी गराउनुभयो ।’

त्यस्तै बैठकले अछाम, दार्चुला लगायतका जिल्लामा अविरल वर्षाका कारण गएको पहिरोबाट भएको जनधनको क्षतिप्रति दुख प्रकट पनि गरेको उनले जानकारी दिए ।