जनता समाजवादी पार्टी (जसपा) नेपालका अध्यक्ष उपेन्द्र यादवले राष्ट्रपति विद्यादेवी भण्डारीले संविधानको उल्लंघन गरेको बताएका छन् ।

बुधवार पार्टी जिल्ला कमिटीको पुनर्गठन घोषणा कार्यक्रमका लागि हेटौंडामा आएका अध्यक्ष यादवले   सञ्चारकर्मीसँग कुरा गर्दै संसदले पारित गरेर राष्ट्रपतिसमक्ष पठाएको नागरिकता विधेयकलाई पारित नगरेर संविधानको संरक्षकले नै संविधानको उल्लंघन गरेको आरोप लगाए ।

उनले भने, ‘हाम्रो संवैधानिक व्यवस्थामा कार्यकारी अधिकार राष्ट्रपतिमा छैन तर पनि राष्ट्रपतिले राय सुझावसहित नागरिकता विधेयक फिर्ता पठाए । फिर्ता आएको विधेयकलाई पुनः पारित गरिसकेपछि राष्ट्रपतिले हस्ताक्षर गर्नुपर्थ्यो । कतिपय मुलकमा संसदले पारित गरेर पठाएको विधेयक स्वतः कानूनमा बदलिन्छ ।’

उनले भने, ‘यो भएन, त्यो भएन भन्ने अधिकार संसदको हो, राष्ट्रपतिको होइन । उहाँसँग अप्सन छैन । संसदले पारित गरेको कुरालाई राष्ट्रपतिले  प्रमाणीकरण मात्रै गर्ने हो ।’

पुरानो सरकारले ल्याएको विधेयक प्रमाणीकरण गर्न हुने तर अहिले त्यही विधेयक कमा, फुलस्टप परिवर्तन नगर्दा पनि नहुने अवस्थाबारे यादवले प्रश्न गरे । ‘यहाँ सविधानको संरक्षक राष्ट्रपति हुने लेखिएको छ तर जो संविधानको संरक्षक हुन्, उसैले सविधानको उल्लंघन गरे । यस्तो कार्य निरन्तरता रह्यो भने भोलि आउने दिनमा सरकार, संसद र राष्ट्रपतिबीच द्वन्द्व पैदा हुन्छ  । भोलि राष्ट्रपतिले शपथ ग्रहण गराएन भने के हुन्छ ? राष्ट्रपतिले शपथ ग्रहण गराएन भने सरकार नै बन्दैन अनि मुलुक कहाँ जान्छ ?’ उनले प्रश्न गरे ।