चलचित्र ‘प्रेमगीत ३’ शुक्रवारदेखि नेपाल, भारतसँगै विभिन्न देशहरूमा एकसाथ प्रदर्शनमा आउँदैछ । चलचित्र प्रदर्शनमा आउँदै गर्दा निर्माता एवं निर्देशक सन्तोष सेनले फेसबुकमा एउटा लामो स्टाटस लेखेका छन् । 

उनले आफूहरूले गरेको काम व्यवसाय भन्दा पनि चलचित्र उद्योगको विकास र स्तरोन्नतिको लागि एक नेपाली निर्माताको जिम्मेवारी र कर्तव्य पनि भएको बताएका छन् । सेनले एउटा नेपाली चलचित्र संसारभरका १ हजारभन्दा धेरै हलमा लाग्दै गर्दा राजनीतिक दलका नेताहरू यसबारे किन बेखबर होलान् भनेर गुनासो समेत गरेका छन् । 

उनी लेख्छन्, ‘एउटा नेपाली चलचित्र संसारभरका १ हजारभन्दा धेरै हलमा लाग्दैछ । हिन्दी भाषामार्फत नेपाली चलचित्रले विश्व चलचित्र उद्योगमा प्रवेश गरेको छ । तर, अनावश्यक एकले अर्कालाई गाली गर्ने, सधै सत्ताको लागि लडाइँ गर्ने राजनीतिक दलका नेताहरू यसबारे बेखबर किन हुनुभएको होला ? चलचित्र उद्योगको स्तरोन्नतिका लागि उहाँहरूको कुनै पनि दायित्व छैन र ? चलचित्र उद्योग पनि उद्योग हो, यो उद्योगमा पनि धेरै नेपालीहरू आश्रित छन् भन्ने किन उहाँहरूलाई अहिलेसम्म मनन् भएन होला ? हामीहरूको यो सफलतामा उहाँहरूले हौसलास्वरुप केही धारणा राख्ने, समाजिक सन्जालहरूमार्फत हामीहरूका लागि थप प्रेरणा दिने किसिमका कुनै पोस्टहरू राख्नुपर्ने होइन  ?’ 

भारतमा मुख्यमन्त्री, मन्त्रीहरू तथा विभिन्न राजनीतिक दलका नेताहरूले चलचित्रबारे निरन्तर चासो दिइरहेको समेत सन्तोषले बताएका छन् । त्यहाँका व्यापारी, उद्योपतिहरूले पनि चासो दिइरहेको उनको भनाइ छ । ‘तर, स्वयं मेरो देशका नेता तथा मन्त्रीहरू कता हुनुहुन्छ खै !’, सन्तोषले लेखेका छन् । 

सन्तोषले चलचित्रकर्मीहरूको दुःख र पीडा बुझ्ने आफूहरूको अभिभावक संस्था चलचित्र विकास बोर्डले दर्शकहरूको मागअनुसार चलचित्र हललाई सौहार्दपूर्ण वातावरणमा चलचित्र लगाउने वातावरण बनाइदिन पनि स्टाटसमार्फत अनुरोध गरेका छन् ।