राष्ट्रिय स्वतन्त्र पार्टीका सहमहामन्त्री कविन्द्र बुर्लाकोटीले गोरखा २ बाट आगामी प्रतिनिधि सभा सदस्य निर्वाचनमा भाग लिने घोषणा गरेका छन् । उनले सामाजिक सञ्जालमार्फत उक्त क्षेत्रबाट उम्मेदवार बन्ने घोषणा गरेका हुन् । 

गोरखा २ बाट यसअघि तत्कालीन नयाँ शक्ति पार्टीबाट पूर्व प्रधानमन्त्री डा. बाबुराम भट्टराईले निर्वाचन जितेका थिए । हाल उनी नेपाल समाजवादी पार्टीका अध्यक्ष छन् । उनी यसपटक नेकपा माओवादी केन्द्रको निर्वाचन चिह्न लिएर गठबन्धन उम्मेदवारका रुपमा सोही क्षेत्रबाट निर्वाचन लड्ने तयारीमा छन् । डा. भट्टराईसँग निर्वाचन लड्न आफू तयार रहेको बुर्लाकोटीले बताएका छन् । 

बुर्लाकोटीले नेपाली समाजको लोकतान्त्रिकरण, न्याय र समानताका खातिर नेपाली जनताले गरेका तमाम राजनीतिक एवं सामाजिक आन्दोलनहरूलाई सम्मान गर्दै भ्रष्टाचार, बेथिति, नातावाद, कृपावाद र राजनीतिक वंशवादविरुद्ध उम्मेदवारी दिएको बताएका छन् । 

बुर्लाकोटीले सामाजिक सञ्जालमार्फत भनेका छन्, ‘विगतमा मैले युवा नेतृत्व विकास, युवा सहभागिताको अभियान, नीति वकालत, सुशासन, भ्रष्ट्राचारविरुद्धको अभियान र नागरिक आन्दोलनका माध्यमबाट नेपाली समाजको समग्र पक्षलाई नजिकबाट नियालेको छु । आज हामीजस्तो अर्थ–सामाजिक अवस्थामा बाँचिरहेका छौँ त्यसको मूलकारण भनेको मूलधारका भनिएका राजनीतिक  पार्टीहरू र तीनका शीर्ष नेतृत्वको अकर्मण्यता र जनमतप्रतिको बेइमानी हो । मेरा लागि यो उम्मेदवारी केवल चुनावी प्रतिस्पर्धा मात्र होइन । विगत लामो समयदेखि नेपाली राजनीतिमा मौलाएको बेथिति र जनभावना विरुद्धको अराजनीतिक गतिविधिमाथिको विद्रोह हो ।’ 

बुर्लाकोटीले अहिलेसम्म गोर्खाले नेपाललाई चिनाएको भन्दै उनले अब नेपालले गोर्खा चिन्ने बनाउने अठोट ब्यक्त गरेका छन् । उनले भने, ‘यो यात्रामा तपाईंको अमूल्य सुझाव, साथ र सहयोगको अपेक्षा गरेको छु । आउनुहोस्, हामी आँट गरौँ, देश परिवर्तन गरौँ !’