महोत्तरीको बर्दिवास स्थित यातायात व्यवस्था कार्यालयमा कार्यालय प्रमुख रहेका पोषण थापाले सरकारी जागिर छाडेर प्रतिनिधि सभामा स्वतन्त्र उम्मेदवारी दिएका छन् । 

महोत्तरी क्षेत्र नम्बर १ बाट उनले प्रतिनिधि सभामा उम्मेदवारी दिएका हुन् । 

उनी बर्दिवास ११ का वासिन्दा हुन् । 

महोत्तरी १ मा सत्ता गठबन्धनको तर्फबाट नेकपा माओवादी केन्द्रका उपमहासचिव गिरिराजमणि पोखरेल र नेकपा एमालेबाट लक्ष्मी महतो उम्मेदवार रहेका छन् । 

वि.सं. २०५३ सालमा खरिदार भई सरकारी सेवामा प्रवेश गरेका थापा २०६६ मा नासु  बनेका थिए । 

उनी २०७६ मा शाखा अधिकृतमा बढुवा भई हालसम्म कार्यरत रहेका थिए । 

सरकारी सेवामा रहँदा बर्दिवासको विकासका लागि महत्वपूर्ण भूमिका खेलेको भन्दै थापाले अब राजनीतिमा आएर यो क्षेत्रको सेवा गर्ने सोच रहेको बताए । 

‘विगतमा बर्दिवासको विकासका लागि भूमिका खेलें,’ लोकान्तरसँग उनले भने,‘अब राजनीतिमै आएर यो क्षेत्रको विकास गर्छु भन्ने सोचले उम्मेदवारी दिएको हुँ ।’

जलेश्वरबाट बर्दीबासमा नापी कार्यालय, इलाका प्रशासन कार्यालय, कर कार्यालय, यातायात कार्यालय लगायतका सरकारी कार्यालयहरू विस्तार गर्न भूमिका खेलेको हुनाले पनि आफूलाई जनताले मतदान गर्ने उनले बताए।

स्वतन्त्र उम्मेदवार थापाले आफूले स्थानीय तहको निर्वाचनमा नै उम्मेदवार बन्ने सोच बनाएपनि साथीहरूले प्रतिनिधि सभामै जानुपर्ने सुझाव दिएकाले त्यतिखेर चुनावमा सहभागी नभएको समेत बताए ।