प्रभू साहप्रति ओलीको टिप्पणी : एमालेलाई उम्मेदवारविहीन बनाउने षडयन्त्रमा हुनुहुँदो रहेछ

नेकपा एमालेका अध्यक्ष केपी शर्मा ओलीले पार्टी स्थायी कमिटी सदस्य प्रभू साह रौतहट जिल्लामा एमालेलाई उम्मेदवारविहीन बनाउने षड्यन्त्रमा लागेको आरोप लगाएका छन् ।

उनको षड्यन्त्रबारे कतिपयले आफूलाई सूचना दिएकाले अरुलाई टिकट उपलव्ध गराएर मनोनयन गरिएको ओलीले बताए । 

प्राइम टेलिभिजनलाई दिएको एक अन्तर्वार्तामा ओलीले स्थायी कमिटी सदस्य साह सकेसम्म मधेश प्रदेशमा एमालेलाई उम्मेदवारविहीन बनाउने षड्यन्त्रमा लागेका टिप्पणी गरेका हुन् ।

पूर्व माओवादी नेता साह नेकपा विभाजनपछि नेकपा एमालेतर्फ लागेका हुन् ।

‘उहाँ (प्रभू साह) सिङ्गै जिल्लामा एमाले खाली गराउने षड्यन्त्रमा हुनुहुँदो रहेछ, कोसँग मिल्नुभएको छ ? कसको योजनाको अंगको रूपमा काम गर्नुभएको छ ? उहाँले नै जान्ने कुरा भयो तर एमालेलाई उम्मेदवारीबाट सिङ्गो जिल्ला खाली गराइदिने षड्यन्त्रमा रहेको थाहा भयो, प्रदेशको नै म लिएर जान्छु भन्नुभएको थियो,’ ओलीले भने । 

एमालेबाट टिकट लिएर गएका साहले स्वतन्त्र उम्मेदवारी दिएका थिए । ‘म तुरुन्तै उम्मेदवारी दर्ता गर्छु भन्नुभएको थियो । अत्याधिक टिकट राख्न खोज्नुभएको थियो । कतिपय साथीहरूले उहाँको नियत खराब छ भनेपछि अरु क्षेत्रको टिकट दिइयो,’ ओलीले भने । 

साहको स्वतन्त्र उम्मेदवारीसँगै रौतटह–३ मा कुनै स्वतन्त्र उम्मेदवारलाई पार्टी प्रवेश गराएर समर्थन गर्ने तयारी गरिएको छ ।