कात्तिक ४ गते रिलिज हुन लागेको ऐतिहासिक विषयवस्तुमा आधारित रहेर निर्माण गरिएको नेपाली चलचित्र ‘नालापानी’लाई कर छुट दिन पहल शुरू भएको छ ।

चलचित्र विकास बोर्डका अध्यक्ष भुवन केसीले आफूले चलचित्रलाई कर छुट प्रदान गर्न पहल शुरू गरेको जानकारी दिए ।

‘बुधवार सञ्चार सचिव डा. बैकुण्ठ अर्यालसँगको भेटमा नालापानीलाई कर छुट प्रदान गर्ने व्यवस्था मिलाउन अनुरोध गरेको छु । सचिवले तुरुन्तै अर्थ मन्त्रालयमा पत्राचार गर्नुभएको छ,’ केसीले भने, ‘नेपालको गौरवगाथा बोकेको यो चलचित्र नेपालको ऐतिहासिक विषयमा बनेको हुँदा र चलचित्र विकास बोर्डले विशेष चलचित्र घोषणा गरी राष्ट्रपतिबाट सम्मान प्राप्त गरिसकेकाले पनि कर छुटको लागि योग्य छ भनेर मैले पहल शुरू गरेको हुँ । यति मात्रै नभएर हलमा देखाइने विज्ञापन लगायतमा पनि मैले सहजीकरणका लागि पहल गरिरहेको छु ।’

केसीले यस प्रकारका राष्ट्रिय गौरव बोकेका चलचित्रलाई प्रवर्द्धन गर्नुपर्छ भन्ने उद्देश्य आफूले सधैं राख्ने बताए । केसीले बोर्डले ‘नालापानी’लाई दिन सकिने सबै सुविधा दिने उल्लेख गरे ।

‘नालापानी’का निर्माता तथा निर्देशक रिमेश अधिकारीले ढिलै भए पनि राज्यले सुविधा दिन खोजेकोमा खुशी व्यक्त गरेका छन् । उनले भने, ‘हिजो सञ्चार मन्त्रालयका सचिव, उपसचिव, सहसचिव र चलचित्र विकास बोर्डका अध्यक्ष सहितको बैठकमा यो चलचित्रलाई सुविधा प्रदान गर्ने विषयमा गहन छलफल भयो । सचिवले विज्ञापनका लागि विभिन्न निकायमा पहल गर्ने प्रतिबद्धता जनाउनुभएको छ । उहाँले स्थानीय सहितका विभिन्न कर छुटका लागि अर्थ मन्त्रालयलाई अनुरोध गर्न पत्राचार गर्नुभएको छ । यस विषयमा बोर्ड अध्यक्ष भुवन केसीले देखाउनुभएको अग्रसरताबाट म खुशी छु ।’

सन् १८१४ मा देहरादुनस्थित नालापानी गढीमा भएको अंग्रेज–नेपाल युद्धमा नेपाली फौजका तर्फबाट कप्तानी गरेका वीर बलभद्र कुँवरले लडेको ऐतिहासिक लडाइँलाई आधार बनाएर ‘नालापानी’ निर्माण भएको हो । यसमा वीर योद्धा कुँवर र उनका ६०० सेनाले नालापानी युद्धमा कसरी साहस र बहादुरी देखाए भन्ने कुरा देखाइएको निर्माण टीमको भनाइ छ ।

चलचित्रमा अर्जुनजंग शाही, सन्तोष पन्त, देशभक्त खनाल, पूजना प्रधान लगायतका कलाकारहरू शीर्ष भूमिकामा छन् ।