प्रधानमन्त्री तथा नेपाली कांग्रेसका सभापति शेरबहादुर देउवाले गठबन्धनका उम्मेदवारलाई जिताएर नेकपा एमालेका अध्यक्ष केपी शर्मा ओलीलाई  देखाइदिन आग्रह गरेका छन् । मोरङको विराटनगरमा शनिवार आयोजित गठबन्धनको भेलालाई सम्बोधन गर्दै उनले यो निर्वाचनमा गठबन्धनभित्र हार्ने र हराउने छुट कसैलाई नभएको बताए । 

‘अस्ति स्थानीय तहको चुनावमा मैले त हँसिया हथौडामा मतदान नै गरेँ’, उनले भने, ‘गिरिजाप्रसाद कोइरालाले पनि यसअघि नै मतदान गरी सक्नु भएको छ ।’ स्थानीय तहको निर्वाचनमा गठबन्धन दलका उम्मेदवारबीच मत भिन्नता देखिएकाले अहिले गठबन्धन दलका शीर्ष नेताहरू एक छौँ भन्ने देखाउनका लागि देशव्यापी हिँडिरहेको बताए । उनले गठबन्धन दलभित्र कुनै समस्या नभएको पनि दाबी गरेका छन् । 

सभापति देउवाले एमाले अध्यक्ष ओलीले गठबन्धन गर्दा केही नहुने तर, अरूले गठबन्धन गर्दा विभिन्न लान्छना लगाउने गरेकोसमेत आरोप लगाए । उनले केही समय अघिसम्म पार्टीभित्र नै समस्या रहे पनि अहिले कांग्रेस एक ढिक्का रहेको समेत बताए । 

एउटै मञ्चमा रहेका नेता शेखर कोइरालाप्रति हेर्दै देउवाले भने, ‘शेखर जी र म अहिले मिलिसक्यौँ चुनावमा एक ढिक्का भएर प्रतिगामी तत्वलाई पछार्ने खेलमा छौँ ।’ उनले गठबन्धनभित्रका नेता कार्यकर्तालाई एकढिक्का भएर चुनावी अभियानमा लाग्नसमेत आग्रह गरेका छन् ।