राष्ट्रिय प्रजातन्त्र पार्टीकी केन्द्रीय सदस्य तथा प्रतिनिधि सभा सदस्य उम्मेदवार कुन्तीदेवी पोख्रेलले यसपटक काठमाडौं क्षेत्र नं. २ मा राप्रपाको झन्डा गाडेरै छाड्ने ठोकुवा गरेकी छन् । बुधवार बानेश्वरमा आयोजित दीपावलीको शुभकामना आदनप्रदान तथा देउसीभैलो कार्यक्रममा उनले पार्टीको जित सुनिश्चित रहेको दाबी गरेकी हुन् । 

उनले पटक–पटक सत्तामा पुग्दा पनि काम नगर्नेले ‘टुरिष्ट’ उम्मेदवारले फेरि काठमाडौं २ का जनता झुक्याउन खोजेको भन्दै आपत्ति प्रकट गरिन् । चुनावैपिच्छे क्षेत्र परिवर्तन गर्दै हिँड्ने ‘टुरिष्ट’ उम्मेदवारले विकास र समृद्धिका नाममा काठमाडौं २ जनतालाई फेरि झुक्याउन खोजेको पोख्रेलको आरोप छ । 

उनले बाहिरबाट आयातित त्यस्ता उम्मेदवारलाई काठमाडौंको विकास र समृद्धिमा चिन्ता नगरी आफ्नै थातथलोको विकास गरेर देखाउन चुनौती दिएकी छन् । पोख्रेलले नेकपा एमाले, नेपाली कांग्रेस र नेकपा माओवादीको सरकारले यसअघि गरेका विकासे काम जनताले देखिसकेकाले अब झुक्याउन नसक्ने पनि जिकिर गरिन् । ‘मैले चुनाव जितौँ अथवा हारौँ, तर काठमाडौं क्षेत्र नं. २ को विकास निर्माणका काम गरेर देखाउँछु,’ पोख्रेलले प्रतिबद्धता जनाउँदै भनिन्, ‘त्यसको लागि राप्रपाको हलो चिन्हमा भोट दिई मलाई जिताउनुहोस्, तपाईंहरूको सुखदुःखमा सधैं कुन्तीको साथ रहने छ ।’