नेपाली कांग्रेसका युवा नेता तथा काठमाडौंको ५ नम्बर निर्वाचन क्षेत्रका प्रतिनिधिसभा सदस्य उम्मेदवार प्रदीप पौडेलले ‘हटलाइन’ नम्बर सार्वजनिक गरेका छन् । 

पौडेलले मतदाताका समस्या र सुझाव संकलनका लागि हटलाइन नम्बर ९८०२९८०२ सार्वजनिक गरेका हुन् । 

‘चुनावी घरदैलोमा प्रत्येक मतदाता कहाँ जानेक्रममा कतै सम्पूर्ण सदस्य कामकाजमा व्यस्त भएकाले निवासमा भेटिनुभएन भने कतै परिवारका पूरा सदस्यलाई भेट्न पाइएन,’ प्रदीपले भने, ‘जसलाई मैले चाहेर पनि भेट्न सकिनँ, उहाँहरूले फोनबाटै सल्लाह सुझाव दिनुहुनेछ भनेर मैले हटलाइन नम्बर सार्वजनिक गरेको हुँ । तपाईंहरूको सुझाव काठमाडौं–५ का निमित्त मार्गनिर्देशन बन्नेछ । त्यही सुझावलाई नै आत्मसाथ गर्दै अघि बढ्नेछु ।’ 

सार्वजनिक नम्बरमा पौडेलसहित काठमाडौं–५ को प्रदेशसभा तर्फका उम्मेदवारलाई मतदाताले आफ्नो क्षेत्रको समस्या र सुझाव रेकड गर्न सक्ने जनाइएको छ ।

काठमाडौं–५ को प्रदेशसभा (१) मा कांग्रेसका भैरव सापकोटा र प्रदेश (२) मा श्यामबहादुर खड्का चुनावी मैदानमा छन् ।