आसन्न निर्वाचनमा काठमाडौंको ४ नम्बर निर्वाचन क्षेत्र चासोका साथ हेरिएको क्षेत्र हो । नेपाली कांग्रेसका महामन्त्री गगनकुमार थापा र नेकपा एमाले पोलिटब्यूरो सदस्य राजन भट्टराई मुख्य प्रतिस्पर्धी छन् ।

थापाले आफूलाई भाबी प्रधानमन्त्रीका रूपमा समेत घोषणा गरेकाले यस क्षेत्रप्रति सबैको चासो बढेको छ ।

मंसिर ४ गते हुने निर्वाचनमा थापा र भट्टराई दुवै जनाले आफ्नो जीत सुनिश्चित भएको भन्दै आ–आफ्नै अडानमा छन् । यसअघि २०७४ सालको निर्वाचनमा ३ हजार ४१८ मतान्तरले भट्टराईलाई हराएका थापाले अहिले गठबन्धनका कारण आफ्नो जीत सुनिश्चित भएको दाबी गरे ।

विक्रम संवत् २०७४ सालको निर्वाचनमा भट्टराईलाई वाम गठबन्धन (एमाले र माओवादी केन्द्र)को साथ थियो तर यसपटक थापालाई माओवादी केन्द्रसहित एमालेबाट फुटेको एकीकृत समाजवादी लगायतका दलको समर्थन छ । 

बुधवार कपनमा मतदातासँग मत माग्दै गर्दा भेटिएका सत्ता गठबन्धनका साझा उम्मेदवार थापाले आफ्नो जीत सुनिश्चित भएको बताए । यसअघिका निर्वाचनमा आफूप्रति मतदाताको उत्साह अझै पनि उत्तिकै कायम रहेको उनको भनाइ छ । 

‘मतदाताले स्थानीय पूर्वाधार निर्माणका विषय ठाउँअनुसार उठाउनु स्वाभाविक हो तर बन्दै गरेको शहर हो,’ उनले भने, ‘केही समयअघि केही क्षेत्रमा देखिएको सडक र खोपानीको समस्या अहिले धेरै हदसम्म समाधान भइसकेको छ ।’

थापाले यस क्षेत्रका मतदाताले आफूसँग स्थानीय आवश्यकताका साथै मुलुकको चिन्ता व्यक्त गरेको बताए । ‘उहाँहरूसँग अन्तरक्रिया गर्दा अहिलेको निर्वाचनसँगै देशको स्थितिलाई जोडेर कुरा गर्नुहुन्छ,’ थापाले भने । आसन्न निर्वाचनमा विजयी भएपछि आफू कांग्रेसको संसदीय दलको नेतामा प्रतिस्पर्धा गर्ने उनको भनाइ छ । 

आफ्नो योजना आफ्नो निर्वाचन क्षेत्रको विकाससँगै सरकारको नेतृत्व गर्न पाएमा गर्ने भन्नेमा पनि रहेको उनले बताए ।

‘संसदीय दलको नेता छान्दै गर्दा दलको घोषणापत्र लिएर चुनाव लड्नु परोस् भन्ने हो,’ उनले भने, ‘त्यसैले संसदीय दलको नेता लड्दै गर्दा मैले ५ वर्षमा के कस्ता काम गर्ने हो घोषणापत्र नै लिएर जान्छु ।’