बागमती प्रदेशको राजधानी रहेको मकवानपुरबाट प्रतिनिधिसभा सदस्यमा नेकपा एमालेका महेश बर्ताैला विजयी भएका छन् । 

प्रतिनिधिसभा क्षेत्र नम्बर २ मा एमालेका नेता महेशकुमार बर्तौलाले सत्ता गठबन्धनका नेकपा एकीकृत समाजवादीका उम्मेदवार विरोध खतिवडालाई पराजित गरेका हुन् ।

कूल ८६ हजार ६५२ मत खसेको क्षेत्रमा पूर्व स्वास्थमन्त्री समेत रहेका खतिवडाले ३० हजार ३९६ मत प्राप्त गर्दा विजयी बर्ताैलाले ३४ हजार ९१६ मत प्राप्त गरे । दुवैको मतान्तर ४ हजार २२० छ ।

सो क्षेत्रमा तेस्रो पार्टीको रूपमा राष्ट्रिय स्वतन्त्र पार्टी देखिएको छ । प्रतिनिधिसभा सदस्यको प्रतिस्पर्धामा राष्ट्रिय स्वतन्त्र पार्टीका उम्मेदवार भरत पराजुलीले १२ हजार ३९ मत पाएका छन् ।

खतिवडाको विरासत उल्ट्याएका बर्ताैला को हुन् ?

अघिल्लोपटक एमालेबाट जितेर हाल एकीकृत समाजवादीमा रहेका पूर्व स्वास्थ्यमन्त्री विरोध खतिवडा यसपटक फरक दल अर्थात् सत्तारुढ गठबन्धनको नेकपा एकीकृत समाजवादीबाट लडेका थिए । उक्त क्षेत्रमा २०४६ सालपछि भएका सबै निर्वाचनमा एमाले विजयी हुँदै आएको थियो ।

२०४८, २०५१, २०५६ र २०७४ सालको निर्वाचनमा खतिवडा नै विजयी भएका थिए । तत्कालीन समयमा नेता खतिवडाले ४६ हजार ४८१ मत प्राप्त गर्दा कांग्रेस नेत्री महालक्ष्मी उपाध्याय (डिना) ले ३४ हजार ९० मत प्राप्त गरेकी थिइन् । खतिवडा १२ हजार ३९१ मतको फराकिलो अन्तरले विजयी भएका थिए । उनी सांसद भएको ३० वर्षपछि स्वास्थ्यमन्त्री बनेका थिए ।

एकीकृत समाजवादीको मत एकदमै न्युन रहे तापनि सत्ता गठबन्धनको मत एमालेको भन्दा एकदमै धेरै थियो । गत स्थानीय निर्वाचनमा वडाध्यक्षका उम्मेदवारले पाएको मत हेर्दा खतिवडा सहजै विजयी हुने आकलन गरिएको थियो ।

सो क्षेत्रमा सत्ता गठबन्धनका वडाध्यक्षका उम्मेदवारले ५९ हजार ७६५ मत पाएका थिए । एमालेका वडाध्यक्षका उम्मेदवारहरूको मत ३६ हजार ९६२ मात्रै थियो । सत्ता गठबन्धनको दल कांग्रेसका वडाध्यक्षका उम्मेदवारको मत ३४ हजार २३६ थियो  ।

माओवादी केन्द्रका उम्मेदवारले २२ हजार ६७७ मत प्राप्त गरेका थिए । एकीकृत समाजवादीको मत २ हजार ८८ रहेको थियो । 

निर्वाचित बर्ताैला बागमती प्रदेश कमिटी उपसचिव समेत हुन् भने विद्यार्थी राजनीतिबाट पार्टीको राजनीतिमा आएका नेता हुन् । उनी पहिलोपटक संसंदीय निर्वाचनमा होमिएर विजयी भएका छन् ।