रौतहट क्षेत्र नम्बर २ बाट निर्वाचित स्वतन्त्र सांसद किरणकुमार साहलाई एमालेका वरिष्ठ उपाध्यक्ष ईश्वर पोखरेलले फोन गरेर बधाई दिएका छन् ।

प्रभु साहको समूहबाट उम्मेदवार बनेर चुनाव जितेका साहलाई पोखरेलले शुक्रवार बिहान फोन गरेर बधाई दिएको उनका सहयोगीले जानकारी दिए ।

'एमालेका वरिष्ठ उपाध्यक्ष ईश्वर पोखरेलले फोन गर्नुभएको थियो । उहाँले बधाई दिनुभयो । अरू के कुरा भयो म भन्न सक्दिनँ,' साहका सहयोगीले लोकान्तरसँग भने ।

अघिल्लोपटक कांग्रेसका आफ्ताब आलमसँग पराजित भएका साह यसपटक आफ्ताबका छोरा फिरदोश आलमलाई पराजित गर्दै विजयी भएका हुन् ।

साहले ३२ हजार ८४२ मत पाउँदा कांग्रेस उम्मेदवार आलमले २८ हजार २४८ मत मात्र पाए ।

शुरूमा माओवादी त्यसपछि संघीय समाजवादी फोरममा रहेका किरण पछिल्लो समय प्रभु साहसँगै एमालेमा थिए ।

प्रभुले एमालेबाट विद्रोह गरेर  रौतहट– ३ मा स्वतन्त्र उम्मेदवारी दिएपछि किरणले पनि उनकै समूहबाट स्वतन्त्र उम्मेदवारी दिएका हुन् ।

दुवैले चुनाव जित्न सफल भएका छन् । प्रभुलाई सत्ता गठबन्धनले पनि साथ दिएको थियो भने कांग्रेसकै उम्मेदवार रहेको रौतहट २ मा किरणले माओवादी र एकीकृत समाजवादी लगायतका दलको मत पाएका थिए ।