मंसिर ४ गते सम्पन्न प्रतिनिधिसभा तथा प्रदेशसभा सदस्य निर्वाचनमा काभ्रेपलाञ्चोकमा ३२ हजार ४५५ मत बदर भएको छ ।

प्रत्यक्ष तथा समानुपातिक दुवैतर्फ ३ दशमलव ७ प्रतिशत मत बदर भएको हो । 

जिल्लामा १ लाख ८७ हजार ३३० जनाले मतदान गरेका थिए । जिल्लामा ३ लाख १० हजार ६३ मतदाता रहेका थिए ।

जिल्ला निर्वाचन अधिकारी उमेशकुमार राईका अनुसार ८६ हजार ४६२ महिला तथा १ लाख ८ हजार ६८ पुरुष मतदाता मतदानमा सहभागी भएका थिए । क्षेत्र नम्बर १ मा कूल खसेको मतमा प्रत्यक्षतर्फ ४ हजार ४२६ तथा समानुपातिकतर्फ ३ हजार ७२२ मत बदर भएको छ । 

क्षेत्र नम्बर १ प्रदेशसभा (१) मा प्रत्यक्षतर्फ १ हजार ५८४, प्रदेशसभा (२) मा प्रत्यक्षतर्फ १ हजार ४६३ तथा प्रदेशसभा (१) र (२) मा समानुपातिकतर्फ ४ हजार ८७२ मत बदर भएका थिए । क्षेत्र नम्बर २ मा प्रत्यक्षतर्फ ३ हजार ८३७, समानुपातिकतर्फ ३ हजार ९१३ तथा क्षेत्र नम्बर २(१) मा प्रत्यक्षतर्फ १ हजार ४५१, क्षेत्र नम्बर २(२) मा १ हजार ७५१ तथा समानुपातिकतर्फ ५ हजार ४२६ मत बदर भएका थिए । 

प्रतिनिधिसभा तथा प्रदेशसभा निर्वाचनमा प्रत्यक्षतर्फको मतपरिणाम अनुसार काभ्रेपलाञ्चोकका ५० उम्मेदवारको जमानत जफत भएको छ । प्रत्यक्षतर्फ प्रतिनिधिसभा र प्रदेशसभा गरी जम्मा ६४ को उम्मेदवारी कायम भएको थियो । धरौटी जोगाउन नसक्ने उम्मेदवार ७८ प्रतिशत छन् ।