घरको प्लास्टर गर्ने क्रममा चार तले घरबाट लडेर एकजना मजदुरको ज्यान गएको छ । बिहीबार साँझ रामपुर नगरपालिका –५, बेझाडस्थित दुर्गा केसीको पक्की घरमा प्लास्टर गर्ने क्रममा पर्सा छिपहरमाई –३, मंगलापुरका २५ वर्षीय गजेश कुसुहवाको ज्यान गएको हो ।

घरबाट खसेर गम्भीर घाइते भएका कुसुहवालाई उपचारका लागि रामपुर अस्पताल लगिएको थियो । त्यहाँ उपचार हुन नसकेपछि थप उपचारका लागि तानसेनस्थित लुम्बिनी मेडिकल कलेज प्रभास रिफर गरिएको थियो । उपचारको क्रममा उनको मृत्यु भएको प्रहरी नायव उपरीक्षक वीरेन्द्र थापाले जानकारी दिए । घटना बारेमा अनुसन्धान भइरहेको प्रहरीले जनाएको छ ।