सुदूरपश्चिमको एकमात्र उपमहानगरपालिका धनगढी उपमहानगरपालिकाले नागरिकको गुनासो संकलन गर्न नमस्ते मेयर जनगुनासो सुनुवाई सेवा शुरु गरेको छ । भ्रष्टाचार न्यूनीकरण र सुशासन प्रवर्धन गर्नेगरी उपमहानगरपालिकाले सो सेवा सञ्चालनमा ल्याएको जनाएको छ ।

अन्तर्राष्ट्रिय भ्रष्टाचारविरुद्धको दिवसको अवसर पारेर शुक्रबार प्रमुख जिल्ला अधिकारी किरण थापा, मेयर गोपाल हमाल, उपमेयर कन्दकला राना र शिक्षाविद डा. हेमराज पन्त लगायतले नमस्ते मेयर जनगुनासो सुनुवाई सेवाको शुभारम्भ गरे ।  

जनगुनासो सुनुवाई सेवामार्फत सर्वसाधारणको गुनासो संकटन गरी त्यसको सम्बोधनको प्रयास गर्ने उपमहानगरपालिकाले जनाएको छ । मेयर गोपाल हमालले धनगढी उपमहानगरपालिकालाई भ्रष्टाचारमुक्त बनाउन सेवाको आरम्भ गरिएको बताए । ‘भ्रष्टाचारमुक्त नगर बनाउने हाम्रो चाहना छ । यो चाहनामा सबैले साथ दिनेमा विश्वस्त छौं’ उनले भने ।  

उपमहानगरपालिकाको सेवालाई छिटोछरितो बनाउन, भ्रष्टाचारमुक्त नगर बनाउन आफूले अठोट लिएको प्रमुख हमालले बताए । ‘मूल नै फोहोर छ भने पानी सफा आउँदैन, मूल भनेको राजनीतिक नेतृत्व हो । नेतृत्व इमान्दार भयो भने भ्रष्टाचार अन्त्य सम्भव छ’ उनले भने । 

उपमहानगरपालिकाका नेतृत्व भ्रष्टाचारी हुन नहुने भन्दै हमालले धनगढी उपमहानगरपालिकालाई भ्रष्टचारमुक्त बनाउन सबैको सहयोगको अपिल गरे । यो सेवा नेपालमै पहिलो पटक शुरु गरिएको धनगढी उपमहानगरपालिकाका परियोजना अधिकृत मनोज ओझाले दावी गरे ।  

सेवाग्राहीले क्यूआर कोड स्क्यान गरेर फेसबुक, ट्वीटर, इन्स्टाग्राम र ह्वाट्सएप मार्फत गुनासा तथा सुझाव टिपाउन सक्ने उनले बताए । यसैगरी, जनगुनासाका लागि टोलफ्री नम्बर पनि राखिएको छ ।