समानुपातिकतर्फका सांसद छनोटको विषयलाई लिएर राष्ट्रिय स्वतन्त्र पार्टीभित्र विवाद देखिएको छ । ठूला नेताहरूले आफ्ना नजिकका मान्छेलाई छनोट गरेको भन्दै एक केन्द्रीय सदस्यले विरोध जनाएका छन् । 

पार्टीका केन्द्रीय सदस्य गणेश कार्कीले विधि र पद्धति मिचेर आफूलाई सांसद हुन नदिइएको भन्दै आक्रोश पोखेका छन् । सामाजिक सञ्जालमा सन्देश लेख्दै उनले पार्टीका महामन्त्री एवं प्रवक्ता मुकुल ढकालले आफ्नो गुरुआमा र कर्मचारीलाई अवसर दिँदा आफू सांसद हुनबाट रोकिएको बताएका हुन् । 

उनले राष्ट्रिय स्वतन्त्र पार्टीले पुराना दलहरूलाई ‘दामी धक्का’ हानेर उपलब्धी हात पारेको बताएका छन् । तर, उक्त उपलब्धीको दुरुपयोग गरिएको उनको आरोप छ । पार्टीभित्र विधि पद्धति मिचेर उपलब्धीको दुरुपयोग गरिएको भन्दै उनले मतदाताहरूसँग माफी पनि मागेका छन् । 

यस्तो छ कार्कीको सन्देश 

‘म नि झन्डै सांसद भएको थिएँ । हुन्थेँ पनि, यदि राष्ट्रिय स्वतन्त्र पार्टीका महामन्त्री तथा प्रवक्ता मुकुल ढकालजीले आफ्नो गुरुमालाई गुरुदक्षिणा र आफ्नो कर्मचारीलाई अवसर दिन नपरेको भए ।

किनभने, १२ वटा क्लस्टरमा पार्टीभित्र प्रारम्भिक निर्वाचन भएको थियो । म खसआर्य खुलातर्फको दोस्रो नम्बरमा र दिपक बोहोरा तेस्रो नम्बरमा थियौँ । समावेशी र आरक्षणको बिषय के हो भने खुलातर्फबाट महिलाको ३३ प्रतिशत पुगेन भने मात्रै ३३ प्रतिशत पुर्याउने गरि महिलालाई राख्नै पर्ने हुन्छ । नियम त्यहि हो । बिधी त्यहि हो । त्यहि अनुसार पहिलो प्राथमिकता हाम्रो पार्टीबाट ५ जना महिला पर्ने र बाँकी खुलाबाट हुनु पर्ने हो । यसैले मेरो र दिपकजीको सांसद हुने पक्कापक्की नै हो । तर आफ्नालाई काखी च्यापियो । 

जति प्रयास गरे पनि थिति बसाउन सकिएन । म अन्तिमसम्म थिति, बिधि भन्दै आवाज उठाइरहेँ । यत्रा मानिसहरुले आशा गरेको पार्टीलाई दुरुपयोग गर्नबाट रोक्न सकिन । मेरो भागमा पर्ने कमजोरी स्विकार्दै माफी चाहन्छु । तर यो यात्रा रमाइलो थियो । पुरानालाई एउटा दामी धक्का हानिएकै हो तर त्यसको उपलब्धिको दुरुपयोग भयो !’