निर्वाचन आयोगले मंसिर ४ गते सम्पन्न प्रतिनिधिसभा र प्रदेशसभा सदस्य निर्वाचनको अन्तिम प्रतिवेदन राष्ट्रपतिलाई बुझाएको छ ।

राष्ट्रपति कार्यालय शीतल निवासमा बिहीवार आयोजित समारोहमा प्रमुख निर्वाचन आयुक्त दिनेशकुमार थपलियाले प्रतिवेदन राष्ट्रपति विद्यादेवी भण्डारीलाई हस्तान्तरण गरेका हुन् । 

आयोगले निर्वाचनको अन्तिम प्रतिवेदन राष्ट्रपतिलाई हस्तान्तरण गरेसँगै अब नयाँ सरकार गठनको बाटो खुलेको छ । संविधानको धारा ७६ अनुसार राष्ट्रपतिले अब सरकार गठनका लागि आह्वान गर्ने व्यवस्था छ ।

प्रतिनिधि सभामा कुनै राजनीतिक दलले स्पष्ट बहुमत ल्याउन नसकेकाले अब धारा ७६ को उपधारा २ अन्तर्गत २ वा २ भन्दा बढी दलको समर्थनमा सरकार गठन गर्न आह्वान गर्ने सम्भावना छ । 

आयोगले अन्तिम परिणाम बुझाएको ३० दिनभित्र उपधारा २ अनुसारको सरकार नबनेमा संसदको सबैभन्दा ठूलो दलको नेतृत्वमा सरकार गठनको प्रक्रिया शुरू हुनेछ ।