नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले आफ्नो पार्टी सरकारमा जाने पक्षमा नरहेको स्पष्ट पारेका छन् । सत्तारुढ गठबन्धनले सरकार गठनका लागि अनुचित, अपवित्र, फोहोरी उद्देश्य र अभ्यास गरिरहेको भन्दै आफ्नो पार्टी त्यसविरुद्धमा रहेको समेत उनले बताए । 

मंगलवार पार्टीले काठमाडौंमा आयोजना गरेको कार्यक्रममा बोल्दै उनले आफ्नो पार्टीले सत्तामा रहेपनि, प्रतिपक्षमा रहेपनि राष्ट्र र जनताको हितमा सक्रिय एवं जिम्मेवार भूमिका निर्वाह गर्ने बताए । सामाजिक स्थिरता र स्थायित्वको पक्षमा दृढतापूर्वक देश र जनताको सेवा गर्न आफ्नो पार्टी लागिपर्ने अध्यक्ष ओलीले बताए । 

उनले एमालेबाहेक अन्य दलसँग सरकार बनाएर के गर्ने भन्ने कुनै गन्तव्य नै नभएको दाबी गरे । अध्यक्ष ओलीले देश र जनताका लागि भन्दा पनि आफ्नो स्वार्थ पूरा गर्नका लागि सत्तारुढ दलहरु सरकार बनाउने खेलमा लागिपरेकाले त्यसमा आफ्नो पार्टी सामेल हुन नचाहेको स्पष्ट पारे । 

‘सरकार के का लागि भन्ने हामीले सुनिराख्या छैनौँ । को प्रधानमन्त्री हुने ? को राष्ट्रपति हुने ? कसले प्रधानमन्त्री छोडदिन भन्यो रे । अर्कोले म पनि छोडदिन भन्यो रे । यस्तै कुरामा सरकार गठन अड्किएको छ । गठन हुँदा पनि यस्तै कुराको लेनदेनबाट सरकार गठन हुने हो । विचारका लागि, उद्देश्यका लागि, गन्तव्यका लागि, देशका लागि, जनताका लागि, सुशासनका लागि, विकासका लागि सरकार बनिराखेको छैन । सरकार बन्ने प्रयासहरू अहिले कसरी भइराख्या छ ? नेकपा (एमाले) बाहेकका दलहरुको कुरा भन्ने हो भने आज दलहरु नेताका स्वार्थ, लोभ र पदीय आकांक्षाका बन्धक बनेका छन्’, ओलीको दाबी थियो । 

अध्यक्ष ओलीले पार्टी र पार्टी संसदीय दलको नीति, निर्णय र निर्देशन अनुसार चल्न पार्टीका नवनिर्वाचित सांसदहरूलाई निर्देशन दिए । सच्चा जनप्रतिनिधिको रुपमा संसदभित्र र बाहिर पनि वैचारिक रुपमा स्पष्ट र  योजनावद्ध ढंगले अघि बढ्न सांसदहरुलाई सचेत गराए ।

उनले पार्टीले देश र जनताको हितबाहेक अरु  केही पनि नहेर्ने भएकाले पार्टीका सांसदहरुले पनि आफ्नो पार्टी र पार्टी संसदीय दलको आदेश र निर्देशनलाई दृढताका साथ पालना गर्नुपर्ने तर्क गरे ।